Të blesh një veturë në ditët e sotme, nuk është lehtë, jo vetëm për çmimet e larta por edhe për cilësinë. Pritjet për një makinë të re të porositur mund të jeni deri në tre muaj si pasojë e mbingarkimit të tregut botëror të industrisë së automobilave, shkruan Alsat.

Por, qytetarët tanë më shumë preferojnë të blejnë makina të përdorura të importuara. Ndonëse shumica me kilometra të kthyera pa asnjë kontroll nga autoritet e shtetit, qytetarët thonë se bëjnë kompromis për t’u dalë më lirë.

Sipas Drejtorisë së Doganave, në 6 muajt e parë të këtij viti janë importuar mbi 25 700 vetura, prej të cilave afër 19 300 janë të përdorura.

Kjo nënkupton që rreth 6 400 vetura të reja janë zhdoganuar në gjysmën e parë të këtij viti, prej të cilave gjithsej shteti ka akumuluar mbi 5,5 milionë denarë ose mbi 90 mijë euro fitime nga taksat e zhdoganimit.

Në gjysmën e parë të vitit 2024 janë importuar gjithsej 25 709 vetura.

Në periudhën janar-qershor 2024 janë importuar 19 286 automjete të përdorura.

Prej të cilave 6 423 të reja dhe 19 286 të përdorura = 5 589 690 denarë.

“Ndërkaq tregtarët ankohen për rritjen e taksës ekologjike nga shteti, gjegjësisht për makinat që janë më të vjetra se viti 2010 dhe katalizatorin e kanë të standardit ‘Euro 4’ e poshtë, e kanë tarifën më të shtrenjtë që nënkupton se paguajnë më shtrenjtë. Por, shteti nuk e zgjidh problemin e ndotjes për shkak se ato përsëri qarkullojnë në treg dhe nëpër rrugët tona, por konsumatori final e paguan më shtrenjtë për ta vozitur në njëjtën”, raporton gazetari i Alsat, Adnan Qaili.

Tregtarët e makinave që vizituam nëpër Shkup thonë se shitja ka pësuar rënie drastike si pasojë e ngritjes së çmimeve. Një veturë e vogël dhe e vjetër mbi 16 vjeçare aktualisht ka çmimin 5 mijë euro, gjë e cila është e pakapshme për çdo qytetarë. Ata thonë se çmimet u rritën si pasojnë e ngritjes së taksës ekologjike, duke dëmtuar rëndë bizneset e tregtisë së makinave të përdorura.

“Shteti duhet t[i ulë këto shpenzime doganore që të jetë më lehtë për konsumatorin e fundit që blen makina. Qytetarë s’kanë para të blejnë makina të reja dhe me këtë standard janë të shtrenjta, kur të gjitha shtetet i kanë më lirë këto tarifa në rajonin tonë si Serbia, Kosova, Shqipëria, këtu te ne paguajmë më shtrenjtë. Ne kemi komunikim me të gjithë tregtarët e makinave, në këto tre muajt e fundit shitja ka rënë shumë, diku 80% shesim më pak, problemin nuk e dimë çfarë është”, tha Ismail Mehmeti, tregtar makinash.

Ndonëse në vendet e rajonit, tregu është stërmbushur me makina të vjetra me origjinë nga shteti korean, në vendin tonë nuk është se preferohen shumë. Sipas të dhënave të Drejtorisë së Doganave

në gjysmën e parë të vitit 2024 janë importuar gjithsej 21 makina të përdorura nga Koreja e Jugut. Qytetarët tanë mbeten besnik të makinave me origjinë gjermane, prej ku ndihen më të sigurt të investojnë në prodhimet e automobilave me standarde të Bashkimit Evropian. / Alsat.mk