Që prej tre dekadash, Qenan Beqiri nga fshati Siniçan, merret me bletari. E ka pasion por edhe siguron jetesën, shkruan Alsat.
Nga bletët mund të jetojë një familje dhe të ketë të ardhura normale, por, vetëm kur ka më shumë koshere, respektivisht rreth 200 të atilla.
Dhe gjithnjë, nëse ky kultivim i bletëve dhe mjaltit, bëhet në mënyrë natyrale.
“Profitabile është nëse ka mbi 150 – 200 koshere mund të jetoj një familje nga bletët, por përveç biznesit familjar sigurojmë për familjen edhe mjaltë për të ngrënë”, tha Qenan Beqiri, bletar.
Por si duket për Beqirin, ruajtja e bletëve dhe prodhimi i mjaltit nuk ishin të mjaftueshme. Duke ditur vetitë kuruese jo vetëm të mjaltit, por edhe të polenit, hojes dhe përbërësve të tjerë që kanë kosheret e bletëve, Beqiri, filloi të merret edhe me mjekësi alternative, e që sigurohet pikërisht nga kosherja e bletëve.
“Quhet API terapi, ndryshe nga mjekësia moderne është paraprirësja e çdo medikamenti modern, sepse i takon mjekësisë popullore. Por që sipas Zotit Beqiri ka efekt të jashtëzakonshëm, sidomos, si anti alergens, por interesantja është se ky inhalim, nuk ka medikamente, nuk ka kemikate, por thjeshtë është aroma e kosheres së bletës”, raporton gazetari i Alsat, Bashkim Sulejmani.
“Në përgjithësi shëron traktin respirator, sinuset, migrenën, pagjumësia, stresi”.
Gazetari :Çka thithim çfarë përbërje ka ky inhalim?
“Kjo ka përbërje kryesisht natyrale nga lulet, dhe e quajnë API aerosol, këtu thithet ajri i avullit të mjaltit, propolisit, polenit, qumështit të mëmës, helmit të bletës, dhe përbërje të tjera që ndoshta ende si kemi zbuluar. Kjo metodë shpejt ka filluar, nuk njihet mirë, por në shtetet e jashtme po Slloveni, Austri e tjera, në Rusi madje e kanë fut edhe në sistem të mjekësisë. Tek ne shpejt ka filluar në Maqedoni, Shqipëri e Kosovë, por në shtet tjera është shumë më e përhapur”, tregon tutje Beqiri.
Api terapia, fillimisht nisi të përdorët në Rusi, ku edhe sipas të dhënave, është vendosur si pjesë përbërëse e mjekësisë moderne, ndërsa në vendin tonë, tre vitet e fundit, ky lloj i mjekësisë alternative po përhapet me të madhe./ Alsat.mk
