Arabia Saudite ka njoftuar të premten se e vlerëson bisedën telefonike midis presidentit amerikan, Donald Trump, dhe atij rus, Vladimir Putin, duke e mirëpritur idenë për të mbajtur takimin në mes të dy liderëve në kryeqytetin saudit Riyad, raporton agjencia e lajmeve Reuters.

Të dy liderët biseduan të mërkurën dhe njoftuan opinionin e gjerë se kishin për qëllim të takoheshin sy më sy, për të diskutuar në raport me negociatat e ardhshme për luftën në Ukrainë.

Princi i Arabisë Saudite, Mohammed bin Salman, ishte lideri i parë i huaj me të cilin presidenti Trump ka biseduar në telefon pas ardhjes së tij në pushtet. Presidenti amerikan e kishte përshkruar princin saudit si “person fantastik” gjatë fjalimit të tij përmes një adresimi elektronik në Forumin Botëror Ekonomik në Davos të Zvicrës.

Presidenti rus Putin kishte vizituar Arabinë Saudite dhe Emiratet e Bashkuara Arabe në vitin 2023, dhe kishte deklaruar në shtatorin e vitit të kaluar se ishte mirënjohës ndaj princit Bin Salman për rolin e tij ndërmjetësues në shkëmbimin e të burgosurve midis SHBA-së dhe Rusisë.