Ndodh edhe kjo! Nxënës të dy shkollave të mesme në Tetovë, gjimnazit dhe shkollës ekonomike, kanë ikur nga orët mësimore që ta arrijnë kohën e iftarit në shtëpi. Përveç kësaj, në redaksinë e Televizionit 21 kanë ardhur video që tregojnë se në mësim kanë munguar edhe nxënës në shkollën e mesme të mjekësisë. Nazmi Dauti nga sektori komunal për arsim na tha se në asnjë rast, ky sektor apo shkollat, nuk kanë lejuar që të ketë shkurtim të orëve apo lirimin e nxënësve nga shkolla. Bëri apel që të ndiqet mësimi dhe të mos ikin shkaku i iftarit.
“Shkollat e mesme kanë bërë një adaptim të orarit që në kohën e iftareve të mund të jetë i zgjatur pushimi i gjatë dhe assesi të ndërpritet procesi edukativ-arsimor, qoftë me fe, qoftë me ligj, pasi që edhe fjala e parë e zbritur nga Zoti është fjala “Ikre” – “mëso dhe lexo në emër të Zotit tënd”, kështu që u bëj apel dhe prindërve, pasi që kishin bërë paralajmërime për bojkot të procesit arsimor, prindërit dhe nxënësit duhet të dinë se nuk mund të bojkotohet gjëra më hyjnore”, tha Nazmi Dauti – Sektori për Arsim-Tetovë.
