Ministria e Ekonomisë po punon për ndryshime ligjore sa i përket veprimtarisë së objekteve gastronomike, me çka do të rriten dënimet për ata që nuk respektojnë kushtet për funksionim, shkruan Alsat.
Ministri i Ekonomisë, Besar Durmishi, nuk e di se sa do të jenë gjobat e reja por thekson se do të kthehen gjobat nga ligji paraprak.
“Këto ndryshime do të mundësojnë që verifikimi i kushteve minimale teknike për punë të kryhen para se të lëshohet licenca për punë. Me këtë, aplikacioni për përmbushjen e kushteve minimale teknike për ushtrimin e veprimtarisë hoteliere, para se të dorëzohet si dokument shoqërues në kërkesën për licencë do të duhet konfirmim për vërtetësinë nga Inspektorati Shtetëror i Tregut”, tha Besar Durmishi, Ministër i Ekonomisë.
Deri tani vërtetësinë e informacioneve apo se i plotëson të gjitha kushtet teknike për punë, e ka konfirmuar vet parashtruesi i subjektit, përmes një deklarate në noter.
Durmishi njoftoi se pas tragjedisë në Koçan, janë kryer 116 mbikëqyrje të jashtëzakonshme mbi objekte gastronomike me çka janë shqiptuar 10 ndalesa për punë për kafene dhe klube, ndërsa 15 nga 23 subjektet të cilat kanë licencë, nuk i plotësojnë kushtet minimale teknike.
Për gjashtë subjekte të cilat nuk kanë apo u ka skaduar licenca u janë shqiptuar ndalesa për kryerje të veprimtarisë ndërsa janë shqiptuar mbi 60 gjoba./ Alsat.mk
