Në kuadër të manifestimeve për Vidovdanin në Gazimestan, Policia e Kosovës ka arrestuar një huligan serb, i cili refuzoi t’u bindet urdhrave të forcave të rendit.
Burimet bëjnë me dije se i arrestuari mbante në dorë një fanellë me portretin e Aleksandër Arsenijeviq, një figurë e njohur për përfshirje të dyshuar në aktivitete kriminale dhe provokime etnike në veri të Kosovës.
Ngjarja ndodhi në një atmosferë të tensionuar, ku autoritetet kosovare ishin vendosur në gatishmëri për të parandaluar çdo lloj incidenti gjatë ceremonive të organizuara nga komuniteti serb.
Policia e Kosovës ka bërë të ditur se nuk do të tolerojë asnjë formë të shkeljes së rendit publik, sidomos në aktivitete ku janë të pranishme simbole apo figura që nxisin urrejtje dhe përçarje ndëretnike.
Hetimet ndaj të ndaluarit po vazhdojnë, ndërsa autoritetet kanë shtuar kontrollin dhe praninë në terren për të garantuar sigurinë dhe mbarëvajtjen e aktivitetit.
