Zëvendëskryeministri i parë, Izet Mexhiti, ka reaguar me tone të ashpra pas thirrjeve raciste dhe anti-shqiptare të dëgjuara gjatë ndeshjes së basketbollit në Kumanovë.
“Dënoj ashpër thirrjet raciste dhe anti-shqiptare të dëgjuara gjatë ndeshjes së basketbollit, në Kumanovë,” deklaroi Mexhiti përmes një reagimi publik.
Ai theksoi se urrejtja nuk ka vend në një shoqëri demokratike dhe të barabartë:
“Fjalët fyese dhe këngët që nxisin urrejtje, nuk kanë vend në shtetin dhe shoqërinë tonë. Ato përbëjnë një sulm ndaj bashkëjetesës, dhe barazisë që e bëjnë Maqedoninë e Veriut unike.”
Sipas Mexhitit, Maqedonia e Veriut është një shtet për të gjithë qytetarët e saj, pa dallim etnie:
“Maqedonia e Veriut është shtet i përbashkët për të gjithë: maqedonas, shqiptarë, turq, romë, vllahë, boshnjakë e të tjerë. Të gjithë kontribuojmë për këtë vend. Të gjithë meritojmë respekt.”
Ai përfundoi reagimin me një thirrje për ta mbrojtur sportin si urë lidhëse mes komuniteteve:
“Sporti duhet të na bashkojë, jo të na ndajë. Thirrjet me frymë fashiste, nuk përfaqësojnë askënd prej nesh dhe nuk guxojnë të përsëriten më.”
Reagimi i Mexhitit është mirëpritur nga qytetarë dhe grupe të ndryshme shoqërore që kërkojnë ndëshkim për çdo gjuhë të urrejtjes në hapësirat publike.
