Një ngjarje e paprecedentë ka ndodhur në Japoni. Autoritetet e qeverisë kanë urdhëruar ushtrinë që të dalë në rrugë e armatosur.
Ushtria japoneze dërgoi trupa në rajonin malor të vendit, për të kapur arinjtë pas një apeli urgjent nga autoritetet lokale, që po përpiqen të përballojnë një valë sulmesh.
Operacioni filloi në qytetin japonez të Kazunos , ku banorëve u është thënë për javë të tëra të shmangin pyjet e dendura që rrethojnë qytetin, të qëndrojnë brenda pas errësirës dhe të mbajnë zile për të trembur arinjtë që mund të jenë duke kërkuar ushqim pranë shtëpive të tyre.
Ka pasur më shumë se 100 sulme nga arinjtë, duke vrarë një rekord prej 12 personash në të gjithë Japoninë që nga prilli, sipas ministrisë së mjedisit.
Dy të tretat e këtyre vdekjeve kanë ndodhur në prefekturën Akita, ku ndodhet Kazuno dhe në Ivate fqinje.
“Banorët e qytetit e ndiejnë rrezikun çdo ditë”, tha kryebashkiaku i Kazunos, Shinji Sasamoto, pasi takoi rreth 15 ushtarë që mbërritën në qytet me një kamion ushtarak dhe disa xhipa ushtarakë të pajisur me jelekë mbrojtës dhe harta të mëdha.
“Kjo ka ndikuar në mënyrën e jetesës së banorëve, duke i detyruar ata të ndalojnë së dali ose të anulojnë ngjarjet”, tha Sasamoto.
Ushtarët do të ndihmojnë në transportimin, vendosjen dhe monitorimin e kurtheve që do të përdoren për të kapur arinjtë, të cilët më pas do të vriten nga gjuetarë të trajnuar me armë më të përshtatshme për këtë qëllim.
Autoritetet në Akita thonë se shikimet e arinjve janë gjashtëfishuar këtë vit në më shumë se 8,000, duke bërë që guvernatori i prefekturës të kërkojë ndihmë nga Forcat e Vetëmbrojtjes së vendit javën e kaluar.
Pas Kazunos, një qytet me rreth 30,000 banorë i njohur për burimet e tij të nxehta, peizazhet mahnitëse dhe një shumëllojshmëri mollësh të ëmbla, trupat do të shkojnë në qytetet Odate dhe Kitaakita sipas një marrëveshjeje që pritet të zgjasë deri në fund të muajit.
Një popullatë në rritje e arinjve, ndryshimet klimatike që ndikojnë në burimet natyrore të ushqimit dhe shpopullimi i zonave rurale po çojnë në kontakt më të shpeshtë njerëzor me arinjtë në Japoni.
Arinjtë e zinj të Japonisë, të gjetur në pjesën më të madhe të vendit, mund të peshojnë deri në 130 kilogramë , ndërsa arinjtë kafe në ishullin verior të Hokkaidos peshojnë deri në 400 kilogramë.
Nuk është hera e parë që Japonia dërgon trupa për të ndihmuar në kontrollin e jetës së egër. Rreth një dekadë më parë, ushtria siguroi mbikëqyrje ajrore gjatë gjuetisë së drerëve të egër dhe në vitet 1960 ndihmoi në vrasjen e luanëve të detit për të mbrojtur peshkimin vendas.
