Presidenti francez, Emmanuel Macron, nga vizita që mbajti një ditë më parë në Qipro, njoftoi se Franca dhe aleatët e saj po përgatiten për një mision thjesht mbrojtës dhe mbështetës për të rihapur ngushticën e Hormuzit, ku dhjetëra anije kanë mbetur të bllokuara që nga fillimi i luftës në Iran.
Gjatë një udhëtimi njëditor në ishullin lindor të Mesdheut, shteti anëtar më i afërt i BE-së me Lindjen e Mesme, ai tha se misioni do të fillonte “sa më shpejt të jetë e mundur pasi të mbarojë faza më intensive e konfliktit”.
Ministri i Transportit Detar i Greqisë e ka përshkruar situatën në ngushticë si “alarmante”, duke thënë se shumë anije cisternë kanë mbetur të bllokuara në rrugën ujore kyçe që kur filluan sulmet ajrore të SHBA-së dhe Izraelit kundër Iranit. Rreth një e pesta e furnizimeve botërore me naftë kalon nëpër ngushticë çdo ditë.
“Është thelbësore për tregtinë ndërkombëtare, por edhe për rrjedhën e gazit dhe naftës, të cilat duhet të jenë në gjendje të largohen përsëri nga ky rajon”, u tha Macron gazetarëve.
Udhëheqësi francez u zotua gjithashtu se Bashkimi Evropian do të bëjë gjithçka që është e mundur për të mbështetur Qipron, ku disa vende të BE-së kanë nxituar të vendosin anije dhe avionë luftarakë pas sulmit me dronë kundër një baze britanike në ishull.
