Deklaratat e fundit të Donald Trump për luftën që po zhvillohet në Lindjen e Mesme kanë shkaktuar reagime të forta nga Berlini.
Në një intervistë për gazetën Financial Times, presidenti amerikan paralajmëroi se NATO mund të përballet me një “të ardhme shumë të keqe” nëse aleatët e SHBA-së nuk mbështesin përpjekjet për hapjen e Ngushticës së Hormuzit.
“Ekziston edhe diçka që quhet NATO”, u shpreh Trump, i cili prej kohësh ka kritikuar aleatët e Shteteve të Bashkuara në Aleancën e Atlantikut të Veriut.
Deklaratat e Trumpit nuk kaluan pa reagim në Berlin, i cili u përgjigj me tone të ashpra.
“Kjo nuk është lufta jonë”, theksoi ministri gjerman i Mbrojtjes, Boris Pistorius, duke shtuar: “Çfarë pret Trump nga një grusht fregatash europiane që nuk mund ta bëjë vetë marina e fuqishme amerikane? Ky nuk është lufta jonë, nuk e kemi nisur ne”.
Ai sqaroi gjithashtu se përgjegjësia kryesore e Gjermanisë si aleate është brenda NATO-s.
“Si partnerë në NATO, përgjegjësia jonë e parë është NATO dhe krahu lindor i saj”, deklaroi Pistorius.
Në të njëjtën kohë, ai përsëriti se Gjermania nuk do të marrë pjesë me Forcat e saj të Armatosura në një operacion për sigurinë e Ngushticës së Hormuzit.
