Një video në TikTok, ku një vajzë qan mes shkëmbinjve pasi partneri e kishte lënë vetëm në shteg duke e pritur vetëm në fund të tij, ka hapur “Kutinë e Pandorës” për një fenomen sa të vjetër, aq edhe shqetësues: “divorcin alpin”.
Me 26 milionë shikime, kjo dëshmi ka nxitur mijëra gra të tregojnë historitë e tyre të braktisjes në vende të izoluara, ku mbijetesa nuk është më një metaforë, por një sfidë fizike. Termi i referohet braktisjes së qëllimshme ose nga neglizhenca të një personi në mjedise malore të vështira.
Ndonëse malet duhet të ishin hapësira të një aktiviteti të përbashkët e paqësor, rritja e numrit të alpinistëve amatorë ka nxjerrë në pah dinamika pushteti toksike. Shpesh, partneri më me përvojë (zakonisht burri) shfaq një ego konkurruese, duke injoruar lodhjen apo frikën e partneres, deri në pikën e lënies pas dore në raste rreziku.
Rasti më tragjik që solli këtë fenomen në qendër të vëmendjes është ai i austriakut Thomas Plamberger. Në janar të vitit 2025, ai lejoi që e dashura e tij, Kerstin Gurtner, të vdiste nga i ftohti gjatë ngjitjes në Grossglockner.
Plamberger e la atë vetëm për të kërkuar ndihmë, por gjykata e dënoi për neglizhencë të rëndë. Ai e kishte lënë Kerstin të varur në parzmore, pa batanije termike dhe me pajisje të liruara, ndërsa vetë e kishte vendosur telefonin në modalitetin “silent” pasi kishte njoftuar shpëtimtarët, duke humbur kontaktin për orë të tëra.
Gjatë gjyqit, një ish-partnere e tij dëshmoi se ai e kishte braktisur në rrethana të ngjashme vite më parë, por ajo fatmirësisht kishte mbijetuar. Ekspertët e alpinizmit, si Maya Silver dhe Julie Ellison, theksojnë se ekzistojnë dy lloje të këtij “divorci”.
I pari është ai ekstrem, ku dikush dërgon partneren në mal me qëllimin e fshehtë për një “aksident” fatal. I dyti, shumë më i përhapur, lidhet me neglizhencën dhe egon mashkullore. Për shumë gra, kjo braktisje në shtigje të ashpra është kulmi i një abuzimi emocional që ka nisur shumë kohë para ngjitjes.
Për të shmangur tragjedi të tilla, këshillohet që çdo shëtitje në lartësi të planifikohet sipas aftësive të personit më pak me përvojë. Gratë inkurajohen të mos mbështeten verbërisht te partneri, por të kenë burime të pavarura informacioni dhe pajisje mbrojtëse me vete.
Tek e fundit, mali nuk është vendi për të matur forcën e egos, por vendi ku solidariteti duhet të jetë po aq i fortë sa shkëmbi. Nëse partneri ju lë pas në një shteg të vështirë, ai nuk po ju sfidon të bëheni më të fort, por ju tregon se jeni vetëm, edhe para se të arrini në majë.
