Presidenti bjellorus Alexandër Lukashenko i ka dhuruar një pushkë udhëheqësit të Koresë së Veriut Kim Jong Un, ndërsa ata nënshkruan një traktat miqësie në Phenian, raportojnë mediat shtetërore.
Të dy udhëheqësit, ranë dakord të bashkëpunojnë më ngushtë dhe t’i rezistojnë presionit nga Perëndimi.
Lukashenko i bëri shaka Kim-it se i kishte sjellë një pushkë automatike “në rast se shfaqen armiq”, sipas një videoje të publikuar nga media shtetërore bjelloruse.
Nga ana tjetër, Kim i dha Lukashenkos një shpatë dhe një vazo me një portret të udhëheqësit bjellorus.
“Mund t’ju them si mik, si një person që ka parë gjithçka në këtë botë: një e ardhme e shkëlqyer e pret vendin tuaj me këtë popull punëtor dhe të disiplinuar”, i tha Lukashenko Kim-it.
Lukashenko e përshkroi traktatin e miqësisë si themelor, ndërsa Kim tha se ai do të “garantonte më tej zhvillimin e qëndrueshëm të marrëdhënieve dypalëshe”, raportoi media vendase.
Të dy udhëheqësit ranë dakord gjithashtu të bashkëpunojnë në fusha që variojnë nga bujqësia te informacioni dhe shëndeti publik.
Koreja e Veriut dhe Bjellorusia janë sanksionuar rëndë nga Perëndimi për shkelje të dyshuara të të drejtave të njeriut dhe për mbështetjen e luftës së Rusisë në Ukrainë. Pheniani përballet me sanksione të veçanta për programin e tij të armëve bërthamore.
Pheniani ka furnizuar ushtarë për pushtimin në shkallë të plotë të Ukrainës nga Rusia. Më shumë se 10,000 koreano-veriorë vlerësohet se janë vendosur për të luftuar përkrah Rusisë.
Në një mesazh drejtuar Presidentit rus Vladimir Putin këtë javë, Kim tha se “Pheniani do të jetë gjithmonë me Moskën”, sipas mediave vendase.
