Sot, pranë vendkalimit kufitar Qafë Thanë afër Strugës, u shënua fillimi i ndërtimit të linjës interkonektive 400 kilovolt nga Manastiri në Elbasan në. Me këtë linjë, e cila është pjesë e rrjetit energjetik evropian, Maqedonia do të jetë e lidhur energjetikisht me të gjithë fqinjët. Bëhet fjalë për një nga projektet më të mëdha elektroenergjetike në dhjetë vitet e fundit, i cili për një kohë të gjatë ka qenë i bllokuar. Me të do të forcohet siguria e furnizimit me rrymë ndërmjet Maqedonisë dhe Shqipërisë, dhe do të rritet stabiliteti i sistemit të transmetimit. Projekti realizohet me ndihmën e një huaje përmes BERZH-it prej 37 milionë euro për MEPSO, dhe një granti shtesë prej 12 milionë euro përmes Kornizës së Investimeve për Ballkanin Perëndimor.
“Ky projekt nuk ishte i lehtë, përkundrazi ishte një nga më kompleksët me të cilin jemi përballur. Kredia ishte siguruar që në vitin 2015, marrëveshja u nënshkrua në vitin 2020, ndërsa realizimi pothuajse inekzistent. Në vend të aktiviteteve ndërtimore, vitet u shpenzuan në negociata, shtyrje dhe përpjekje për ndryshim të çmimeve. U ble vetëm një pjesë e pajisjeve pa ndonjë përparim thelbësor në terren. Ne nuk lejuam që ky projekt të mbetet edhe një mundësi e humbur. Morëm një vendim të guximshëm, por të domosdoshëm për të ndërprerë marrëveshjen e cila nuk jepte rezultate,” deklaroi Kristijan Mickoski – kryeministër.
“Ne shënojmë fillimin e një realiteti të ri energjetik për vendin tonë. Duke hedhur gurthemelin e linjës së transmetimit ndërlidhëse që lidh Maqedoninë dhe Shqipërinë, nga Manastiri në Ohër, deri në Elbasan, ne fillojmë zbatimin e një projekti me rëndësi të jashtëzakonshme për të dy vendet tona dhe rajonin. Ne gjetëm një projekt plotësisht të bllokuar. As 4% nuk ishte zbatuar për 4 vjet,” tha Burim Latifi, Drejtor i MEPSO-s.
