Izraeli po shqyrton një plan për të shkatërruar infrastrukturën civile në qytetet dhe fshatrat libaneze brenda një rrezeje prej 2 deri në 3 kilometrash nga kufiri i tij, me qëllim krijimin e një zone tampon, tha një zyrtar ushtarak izraelit.
Ai theksoi se ky propozim është një nga disa që ushtria po shqyrton, ndërsa harton një rrugë përpara në luftën e saj kundër Hezbollahut, grupit militant të mbështetur nga Irani që vepron nga Libani jugor.
Propozimi do të duhet të miratohet nga udhëheqja politike e Izraelit, e cila tashmë ka treguar një preferencë për kryerjen e shkatërrimit të gjerë të infrastrukturës civile për të krijuar një zonë tampon, duke imituar veprime të ngjashme në Gaza.
“Shtëpitë në fshatrat libaneze pranë kufirit, të cilat në fakt shërbejnë si poste të Hezbollahut, do të shemben në përputhje me modelin e Rafah dhe Khan Younis në Gaza, me qëllim që të eliminohet kërcënimi për komunitetet izraelite”, tha të premten Ministri Izraelit i Mbrojtjes, Israel Katz.
Shkatërrimi i përhapur i infrastrukturës civile pa një domosdoshmëri të qartë ushtarake konsiderohet shkelje e së drejtës ndërkombëtare. Zyrtarët izraelitë kanë dhënë përditësime të herëpashershme mbi planet e ushtrisë së tyre në Liban, shumë prej të cilave përfshijnë plane për të shkuar më thellë në Libanin jugor, thonë ata, për të penguar kërcënimin e një pushtimi nga Hezbollahu.
Ushtria aktualisht po mban pozicione deri në 10 kilometra të thella në Liban, tha më parë për CNN një zyrtar tjetër ushtarak izraelit. Më shumë se 80 qytete dhe fshatra janë boshatisur, më shumë se 15% e popullsisë së vendit është zhvendosur dhe më shumë se 1,300 njerëz janë vrarë nga sulmet izraelite, me mijëra të tjerë të plagosur, sipas ministrisë libaneze të shëndetësisë.
Në një konferencë për shtypin e huaj të premten, zëdhënësi i ushtrisë izraelite, nënkolonel Nadav Shoshani, tha se brenda pak ditësh ushtria do të jetë në gjendje të thotë se ka krijuar “linja mbrojtëse relevante për të parandaluar zjarrin e drejtpërdrejtë drejt komuniteteve të Izraelit verior”, pa dhënë më shumë detaje.
“Ne jemi të përkushtuar ndaj objektivit afatgjatë të çarmatosjes së Hezbollahut. Ekziston gjithashtu një objektiv afatshkurtër tani për të larguar kërcënimet”,shtoi ai.
