Ministri i jashtëm iranian, Abbas Araghchi, ka theksuar se Irani “kurrë nuk ka refuzuar” të marrë pjesë në bisedimet në Pakistan, të cilat synojnë t’i japin fund luftës në rajon. Ai shtoi se vendi i tij kërkon kushte “përfundimtare dhe të qëndrueshme” për t’i dhënë fund konfliktit.
Në javët e fundit, Pakistani ka marrë rolin kryesor në përpjekjet për arritjen e një armëpushimi, duke shprehur gatishmëri për mbajtjen e bisedimeve në Islamabad.
Në një postim në X, Araghchi tha se pozicioni i Iranit po keqinterpretohet nga mediat amerikane.
“Ne jemi thellësisht mirënjohës ndaj Pakistanit për përpjekjet e tij dhe kurrë nuk kemi refuzuar të shkojmë në Islamabad. Ajo që na intereson janë kushtet e një FUNDI përfundimtar dhe të qëndrueshëm të luftës së paligjshme që na është imponuar”, shkroi ai.
Araghchi fajëson mediat amerikane për keqraportimin rreth gatishmërisë së Iranit për t’u angazhuar në negociata, ndërsa agjencitë iraniane të lajmeve kishin raportuar më parë se Teherani refuzoi bisedimet me Washingtonin. Zyrtarët iranianë më parë akuzuan SHBA-në se po përdorte bisedimet si një hile për të nisur më shumë sulme.
