Një projekt për ndërtimin e një xhamie të madhe nga komuniteti shqiptar në Zvicër ka shkaktuar debat të fortë dhe reagime të ndara në opinionin publik.
Sipas raportimit të gazetës zvicerane Blick, bëhet fjalë për një xhami me vlerë deri në rreth 10–15 milionë franga, e planifikuar të ndërtohet nga një shoqatë islame shqiptare në qytetin e St. Gallenit. Projekti parashikon një objekt modern me hapësira për qindra besimtarë dhe ambiente të tjera shoqërore. 
Xhamia pritet të shërbejë jo vetëm si vend faljeje, por edhe si qendër komunitare me funksione sociale dhe kulturore.
Megjithatë, projekti ka nxitur reagime të ashpra, sidomos në rrjetet sociale dhe në rubrikat e debatit publik. Sipas Blick, një pjesë e komunitetit zviceran është shprehur kundër ndërtimit të kësaj xhamie, duke theksuar se projekte të tilla nuk duhet të lejohen në Zvicër.
Kundërshtarët argumentojnë se investime të mëdha fetare mund të ndikojnë negativisht në integrimin dhe bashkëjetesën në shoqëri, ndërsa disa kanë ngritur edhe dyshime për burimet e financimit.
Nga ana tjetër, përfaqësuesit e komunitetit shqiptar theksojnë se projekti financohet kryesisht nga donacione të vetë besimtarëve dhe synon të krijojë një hapësirë moderne dhe transparente për praktikimin e fesë dhe aktivitetet komunitare. 
Ky zhvillim ka rikthyer në vëmendje debatet e vazhdueshme në Zvicër rreth çështjeve të fesë, emigracionit dhe integrimit, duke e bërë këtë projekt një nga temat më të diskutuara të ditëve të fundit
