Burime për Reuters bëjnë me dije se udhëheqësi i ri suprem i Iranit, Mojtaba Khamenei, është ende gjallë dhe po rikuperohet nga dëmtime të rënda në fytyrë dhe në këmbë, duke hedhur poshtë zërat e fundit për vdekjen e tij të mundshme.
Megjithëse 56-vjeçari nuk është parë në publik apo në media që prej sulmit ajror të 28 shkurtit që i mori jetën babait të tij, burimet konfirmojnë se ai mbetet “mentalisht i mprehtë” dhe është i përfshirë aktivisht në vendimmarrjet e rëndësishme shtetërore, përfshirë negociatat delikate për armëpushim me Uashingtonin.
Raportohet se Khamenei pësoi lëndime të rënda që i kanë shpërfytyruar fytyrën dhe i kanë dëmtuar gjymtyrët në sulmin ku humbën jetën edhe anëtarë të tjerë të familjes së tij, gjë që shpjegon edhe mungesën e tij totale në sytë e opinionit publik. Edhe pse spekulimet për vdekjen ose gjendjen e tij vegjetative ishin shtuar pas heshtjes së gjatë, informacionet e fundit sugjerojnë se ai po drejton vendin nga prapaskena, duke komunikuar kryesisht përmes kanaleve të sigurta audio ndërkohë që vazhdon trajtimin mjekësor.
