Rënia e Viktor Orban në Hungari ka krijuar valë tronditjeje në rajon, duke ngritur shqetësim të dukshëm në Beograd, ku presidenti Aleksandar Vuçiç përballet me një situatë të re politike dhe me një mesazh të drejtpërdrejtë që prek brendinë e Serbisë.
Lideri i ri hungarez, Peter Mađar, nuk u mjaftua me fitoren, por i drejtoi një thirrje të qartë qytetarëve serbë: “I them popullit serb të marrë forcë nga zgjedhjet e djeshme në Hungari”. Kjo deklaratë u interpretua menjëherë si një sinjal për ndryshim politik edhe në Serbi, duke rritur tensionin në raportet mes dy vendeve.
Reagimi i Vuçiç ishte i menjëhershëm dhe i fortë. Ai hodhi poshtë çdo insinuatë për lidhje të diskutueshme politike dhe reagoi ndaj deklaratave të Mađar. “Do ta quaja këtë deklaratë të marrë, por nuk dua të prish marrëdhëniet me Hungarinë”, u shpreh presidenti serb.
Në të njëjtën kohë, Vuçiç mbrojti hapur marrëdhënien me Viktor Orban, duke theksuar: “Unë nuk i braktis miqtë, as në të mirë as në të keq”, një deklaratë që tregon qartë rëndësinë që kishte për të aleanca me ish-kryeministrin hungarez.
Tensionet u thelluan edhe më shumë pas paralajmërimit të Mađar se qeveria e tij do të hetojë një incident të dyshimtë pranë një gazsjellësi në Kanjiža, të cilin ai e përshkroi si një operacion të mundshëm të inskenuar gjatë fushatës zgjedhore. Ai kritikoi drejtpërdrejt mënyrën se si Orban e kishte trajtuar situatën, duke e cilësuar si një veprim me elementë propagandistikë.
Vuçiç reagoi edhe ndaj kësaj çështjeje, duke theksuar se Serbia ka zhvilluar hetimet e saj dhe ka zbuluar elementë të rëndësishëm që nuk janë bërë publikë. “Kemi zbuluar shumë gjëra, por nuk kemi dashur t’i publikojmë. Ka pasur shumë kurthe dhe provokime”, tha ai, duke përmendur edhe një telefonatë nga një numër në Prishtinë drejt një ambasade, si pjesë e hetimeve.
Presidenti serb shtoi se Beogradi do ta përfundojë hetimin dhe do ta informojë qeverinë e re hungareze, duke sugjeruar se Mađar është mbështetur në “rrëfime të tabloideve”.
Megjithatë, përtej përplasjes verbale, zhvillimi kryesor mbetet politik: humbja e Orban konsiderohet një goditje e drejtpërdrejtë për Vuçiçin. Për vite me radhë, lideri hungarez ka qenë një nga mbështetësit më të fortë të Serbisë në Evropë, duke ndihmuar në zbutjen e presionit nga Brukseli dhe në ruajtjen e një balance mes Perëndimit dhe Lindjes.
Analistët theksojnë se me largimin e Orban, Vuçiç humbet një “mburojë politike” të rëndësishme dhe mbetet më i ekspozuar ndaj kritikave ndërkombëtare, por edhe ndaj presionit të brendshëm.
Në këtë kontekst, mesazhi i Mađar për qytetarët serbë merr një peshë më të madhe politike. Ai shihet si një sinjal që ndryshimi është i mundur edhe në vende të tjera të rajonit, duke shtuar ndjeshëm shqetësimin në Beograd.
Zhvillimet e fundit tregojnë se ndryshimi në Hungari nuk është vetëm një rotacion pushteti, por një moment që mund të ndikojë drejtpërdrejt në balancat politike në Ballkan. Reagimi i shpejtë dhe i ashpër i Vuçiçit tregon se ai e percepton këtë zhvillim si një sfidë reale, në një kohë kur modeli që e mbështeti për vite po vihet në pikëpyetje. /Pamfleti
