Koalicioni VLEN ka njoftuar se më 9 maj, në Ditën e Evropës, do të kurorëzojë procesin e bashkimit në një subjekt të vetëm politik. Sipas njoftimit zyrtar, kjo datë do të shënojë kalimin nga një koalicion partish në një forcë të unifikuar me një emër, drejtim dhe mision të përbashkët.
Në deklaratë theksohet se ky hap synon t’i japë fund fragmentimit politik në kampin shqiptar, i cili, sipas tyre, për vite është paraqitur si pluralizëm, ndërkohë që ka prodhuar përçarje dhe ka favorizuar interesa personale.
Procesi i bashkimit do të vuloset nga 850 delegatë, të cilët pritet të miratojnë shkrirjen e pesë subjekteve politike në një strukturë të vetme. Ky zhvillim konsiderohet nga drejtuesit e koalicionit si një moment historik për përfaqësimin politik të shqiptarëve.
Zgjedhja e 9 majit nuk është e rastësishme. Dita e Evropës simbolizon bashkimin dhe bashkëpunimin, vlera që VLEN synon t’i reflektojë në skenën politike shqiptare.
Në reagimin e tyre, përfaqësuesit e koalicionit e cilësojnë këtë bashkim si një lajm të mirë për qytetarët që kërkojnë përfaqësim më të qartë dhe përgjegjësi politike, ndërsa për ata që, sipas tyre, kanë përfituar nga përçarja, ky zhvillim shihet si sfidë.
Me sloganin “VLEN NJË”, koalicioni pritet të prezantojë strukturën e re dhe të artikulojë prioritetet e tij politike në fazën e ardhshme.
