Vazhdojnë mosmarrëveshjet mes dy institucioneve. Komuna e Tetovës ankohet se NP “Pyjet e Maqedonisë” edhe sot nuk po lejon që të pastrohet shtrati i Lumit Shkumbin, me arsyetimin se ata nuk kanë leje për transportin e drunjëve. Drejtori i NPK Tetovë Samet Bislimi pyet se kush do të mbajë përgjegjësi nëse kemi vërshime!?
Lumi Shkumbin mbetet i papastruar! Vazhdojnë mosmarrëveshjet mes Komunës dhe Pyjet e Maqedonisë
“Pasi na pengun që të mos punojmë, policia e pyjeve nuk ka ndërmarrë asgjë deri më tani. Nga policia e pyjeve na thanë se ata do të largojnë drutë. Sipas tyre ne nuk kemi të drejtë të bëjmë largimin e drunjëve. Qëllimi i tyre është që të pengojnë punën tonë, kjo shihet qartë, gjë që mund të shihet edhe në terren. Cila është zgjidhja që ofronin ata!? Nuk i kanë larguar, kush do të mbajë përgjegjësi pasi dhe na penguan, kush mbanë përgjegjësi në rast vërshimesh”, tha Bislimi.
Por zv/drejtori i pyjeve të Maqedonisë, Safet Miftari thotë se Komuna e Tetovës duhet të kërkojë leje, pasi drunjët janë në pronë shtetërore.
“Ndërmarrja publike ka të drejtë të bëj një kërkesë tek ne që të priten drutë, të ngarkohen. Se drutë janë tonat, çdo gjë jashtë kësaj i tejkalon ingerencat dhe kjo është. Drutë si i pamë dje në foto ata kishin bërë ngarkesë dhe duhet të jenë falënderues që ne nuk ua morëm edhe kamionin, pasi që kamioni pa leje ose vulë ose pa shënjëhzim kemi të drejtë t’i konfiskojmë edhe automjetet, kamionët. Ne nuk e bëmë atë gjë duke u munduar t’i kursejmë”, tha Miftari.
Miftari kërkoi nga NPK “Tetova” që të drejtohen me kërkesë në Pyjet e Maqedonisë dhe të shenjëzohen se cilat pemë do duhet që të priten.
