Deri pak javë më parë lëshonte dronë dhe raketa. Por duke nisur nga sot, drejt Mekës, Irani do të dërgojë plot 30 mijë pelegrinë për ritin vjetor të haxhit: pelegrinazhi që Islami ua kërkon besimtarëve të paktën një herë në jetë.
Arabia Saudite, pavarësisht armëpushimit në luftën e Gjirit, i ka mbrojtur vendet e saj të shenjta me bateri kundërraketore.
Edhe pse delegacioni iranian këtë vit do të jetë vetëm një e treta krahasuar me më parë, mbretëria ka bërë të ditur se nuk do të tolerojë slogane politike kundër Arabisë Saudite apo përleshje si ato ku në të kaluarën kanë qenë protagonistë pelegrinët nga Teherani. Në vitin 1987, në përplasjet mes sauditëve (sunitë) dhe iranianëve (shiitë) humbën jetën rreth 400 persona.
Mes Mekës dhe Medinës, dy qytetet më të shenjta të Islamit, janë mbledhur tashmë mbi një milion e gjysmë pelegrinë, të veshur të gjithë me të bardha. “Janë 1.518.153 vetëm ata që kanë ardhur nga jashtë”, tha Saleh al Murabba, komandant i policisë kufitare saudite, në një konferencë për shtyp.
Shifrat janë në përputhje me vitet e kaluara, edhe pse lufta e nisur më 28 shkurt i ka bërë fluturimet më të shtrenjta dhe më të rralla në mbarë botën. Qeveria amerikane, që nga fillimi i prillit, i ka këshilluar qytetarët e saj të shmangin udhëtimet drejt Arabisë Saudite për shkak të tensioneve në rajon dhe mundësisë që fluturimet të anulohen pa paralajmërim. Megjithatë, ditët e fundit, pikërisht për haxhin, trafiku ajror është rikthyer përgjatë linjave të Gjirit.
Çdo vit, kërkesat për hyrje në Arabinë Saudite për pelegrinazhin janë shumë më të larta sesa vendet që vihen në dispozicion nga Riadi, i cili e përdor shortin për shpërndarjen e vizave. Këtë vit, pelegrinët nga Gaza mungojnë për të tretin vit radhazi: Izraeli, me përjashtime të rralla, ndalon daljen nga Rripi i Gazës. Ata nga Bregu Perëndimor përfaqësohen nga vetëm 6 mijë persona, për shkak të vështirësive në lëvizje.
Një milion e gjysmë njerëzit e përqendruar në territorin përreth Mekës do të kryejnë ritualet e tyre që nga sot dhe gjatë gjithë javës, me temperatura që arrijnë deri në 45 gradë dhe ato minimale që nuk zbresin nën 28 gradë gjatë natës.
Në vitin 2015, rreth 2 mijë e 300 besimtarë humbën jetën nga shtypja e turmës, në një nga episodet më tragjike të rrëmujës në histori. Një vit më pas, një valë të nxehti deri në 51 gradë shkaktoi vdekjen e rreth 1 mijë e 300 pelegrinëve. Këtë vit, temperaturat parashikohen pak më të buta, por vetëm disi. Qeveria saudite ka vendosur rreth Kubes së Zezë të Qabes dhe përgjatë gjithë itinerarit të riteve 3 mijë ambulanca dhe 50 mijë mjekë.
Epidemia e Ebolës në Afrikën Qendrore rrit më tej rreziqet shëndetësore. Aktualisht, rastet e etheve hemorragjike janë jashtë kontrollit. Edhe pse epiqendra e sëmundjes është në Republikën Demokratike të Kongos, një vend me shumicë të krishterë, CDC Africa (instituti kontinental për kontrollin e sëmundjeve infektive) ka shpallur nivel të lartë rreziku për dhjetë vende fqinje, disa prej të cilave kanë një përqindje të konsiderueshme myslimanësh.
Që nga koha e Covid-it, gjithashtu për arsye shëndetësore, Arabia Saudite ka ndaluar ritin e therjes së bagëtive, etapa përfundimtare e pelegrinazhit. Këtë vit, “festa e sakrificës” bie më 27 maj. Me ndalimin e metodave tradicionale (therja zakonisht bëhej në rrugë), Riadi ka hapur një qendër therjeje prej një milion metrash katrorë, përqendrimi më i madh i bagëtive për qëllime ushqimore në botë.
Ndërkohë, mishi që ndahej me familjarët dhe të varfrit do të mungojë në Gaza. Sipas gazetave palestineze, çmimi i një dashi në Rripin e Gazës ka arritur në 8 mijë dollarë./La Repubblica/
