Presidenti i Shteteve të Bashkuara, Donald Trump, deklaroi se Ngushtica e Hormuzit duhet të rihapet “shumë shpejt”, duke paralajmëruar se në të kundërt Irani do të përballet me “goditje shumë të forta”. Gjatë një interviste të dhënë gjatë vizitës së tij në Kaliforni, Trump tha se Uashingtoni ka zhvilluar “bisedime shumë të mira” dhe përsëriti se Teherani është në kërkim të një marrëveshjeje. I pyetur për konfliktin që ka zgjatur më shumë se pesë muaj, presidenti amerikan u përgjigj shkurt: “Kam kohë”.
Sipas portalit amerikan Axios, i cili citon dy burime në rajon, Omani dhe Irani po diskutojnë një marrëveshje të përkohshme 60-ditore që synon rihapjen e Ngushticës së Hormuzit. Raporti thekson se marrëveshja mund të shpallet së shpejti, megjithëse ende nuk është finalizuar.
Sipas planit të propozuar, anijet që hyjnë në ngushticë do të lundrojnë nëpër ujërat territoriale iraniane, ndërsa ato që dalin do të kalojnë nëpër ujërat e Omanit, pa pagesë. Gjatë periudhës 60-ditore parashikohet gjithashtu çminimi i zonës detare mes dy vendeve, në pritje të një marrëveshjeje përfundimtare. Edhe Sekretari amerikan i Thesarit, Scott Bessent, deklaroi për CNBC se ekziston mundësia që “sot ose nesër” të arrihet një marrëveshje për rihapjen e ngushticës dhe uljen e tensioneve.
Ndërkohë, situata në Ngushticën e Hormuzit mbetet e paqëndrueshme. Shërbimi Britanik i Informacionit për Sigurinë Detare (UKMTO) raportoi se një anije u godit nga një “predhë e panjohur”, duke shtuar shqetësimet për sigurinë e lundrimit në një nga korridoret më të rëndësishme energjetike në botë.
Në përpjekje për të ulur tensionet, Trump zhvilloi një bisedë telefonike me Emirin e Katarit, Sheikh Tamim bin Hamad Al Thani. Sipas Pallatit Emiri, dy liderët diskutuan mënyrat për të afruar Uashingtonin dhe Teheranin dhe për të nxitur dialogun.
Megjithatë, Irani mohoi se po zhvillon negociata të drejtpërdrejta me Shtetet e Bashkuara. Zëdhënësi i Ministrisë së Jashtme iraniane, Esmail Baghaei, deklaroi se Teherani “nuk po negocion me SHBA-në”, por vetëm me Omanin për të garantuar kalimin e sigurt përmes Ngushticës së Hormuzit.
Mohimi i Teheranit shkaktoi reagimin e Trump, i cili javën e kaluar kishte paralajmëruar një “sulm të fortë” ndaj Republikës Islamike, përpara se të njoftonte shtyrjen e operacioneve ushtarake të planifikuara në koordinim me Izraelin. Deklaratat e fundit të presidentit amerikan pasqyrojnë vazhdimin e presionit ndaj Iranit, ndërsa përpjekjet diplomatike për një armëpushim dhe rihapjen e Ngushticës së Hormuzit vijojnë.
