Konglomerati shqiptar BALFIN Group, në pronësi të miliarderit Samir Mane, është pranë blerjes së ish-magazinës Tietz në Stacionin Qendror të Mynihut, pjesë e pasurive të një kompanie të grupit Signa. Banka austriake Raiffeisen Bank International (RBI) pritet të sigurojë financimin për blerjen.
Gati dy vjet pasi nisën përpjekjet për shitjen e ndërtesës historike Tietz, përballë Stacionit Qendror të Mynihut, duket se po shkohet drejt një marrëveshjejeje. Sipas burimeve të njohura me çështjen, ka gjasa të mira që procesi ekskluziv i verifikimit të detajuar, “due diligence”, të çojë së shpejti në nënshkrimin e kontratës. Megjithatë, transaksioni ende nuk rezulton i përfunduar.
Emri që qarkullon si blerës është ai i konglomeratit shqiptar BALFIN Group. Raiffeisen Bank International (RBI), me seli në Vjenë, thuhet se do të sigurojë financimin së bashku me grupin shqiptar. Duke iu referuar sekretit bankar, një zëdhënës i RBI-së as nuk e konfirmoi dhe as nuk e mohoi informacionin. Administratori i falimentimit, Torsten Martini, nuk iu përgjigj kërkesës për koment, ashtu si edhe blerësi i mundshëm. Prona është pjesë e masës së falimentimit të kompanisë së Signa-s në Mynih, Bahnhofplatz Immobilien GmbH & Co. KG.
RBI kishte financuar më parë ndërtesën Tietz me rreth 120 milionë euro për Signa-n e René Benko-s. Por për blerësin e ardhshëm, banka austriake pritet të financojë vetëm blerjen e pronës ekzistuese dhe jo zhvillimin e projektit apo punimet e ndërtimit për transformimin e qendrës tregtare, e cila është mbyllur prej vitesh.
” ”
Çmimi që BALFIN Group, me bazë në Vjenë dhe Tiranë, pritet të paguajë për Tietz-in vlerësohet në 110-120 milionë euro. Kjo shumë do të ishte më e ulët se oferta e bërë vitin e kaluar nga avokati dhe investitori i pasurive të paluajtshme nga Mynihu, Erich Schwaiger.
Schwaiger kishte siguruar më parë të drejtën ekskluzive mbi pronën me një ofertë prej 127.5 milionë eurosh, por marrëveshja dështoi.
