Në zjarrin që përfshiu zonat Lokva Rogoznica dhe Omiš në Kroaci natën e 14 gushtit, 106 automjete, 28 shtëpi, shtatë ndërtesa tregtare, tre objekte hotelerie dhe gjashtë ndërtesa ndihmëse brenda shtëpive familjare u shkatërruan plotësisht.
Prefekti i Qarkut Split-Dalmaci Blazhenko Boban, duke konfirmuar të dhënat e dëmeve të hënën, tha se “45 anije që ishin tërhequr në breg u shkatërruan gjithashtu plotësisht”, raportoi agjencia e lajmeve Hina.
Sipas tij, 43 shtëpi, 20 automjete dhe nëntë anije u shkatërruan pjesërisht. Ai tha se një vlerësim i dëmeve në bujqësi nuk ishte kryer ende.
Ai shtoi se, pasi Qyteti i Omishit t’u përgjigjet raporteve, do të paraqesë një kërkesë në Shtabin e Mbrojtjes Civile për të shpallur një fatkeqësi natyrore, duke kujtuar se kryeministri kroat Andrej Plenković premtoi se qeveria do të ndihmonte gjithashtu në rehabilitimin e zonave dhe ndërtesave dhe kompensimin.
Një zjarr i madh shkatërroi zonën e Omišit në Kroaci të enjten në mbrëmje. Sipas të dhënave të publikuara nga Ministria e Shëndetësisë të premten, 42 persona kërkuan ndihmë mjekësore, 14 prej të cilëve u shtruan në spital, shtatë prej të cilëve ishin në gjendje kritike. Kryqi i Kuq Kroat tha se pothuajse 2,400 persona u trajtuan në Split, Omiš dhe Makarska.
