Turqia ka lëshuar një urdhër arresti ndërkombëtar për kryeministrin izraelit Benjamin Netanyahu në lidhje me rastin e Flotiljes së Gazës, njoftoi qeveria e Ankarasë.
Netanyahu është akuzuar nga Turqia për gjenocid.
Turqia i ka kërkuar Interpolit të lëshojë një kod të kuq për të siguruar arrestimin e kryeministrit dhe një shtetasi tjetër izraelit, Afek Moskovitch, në lidhje me procedurat që lidhen me gjenocidin në Gaza dhe sulmin ndaj aktivistëve të Flotiljes Global Sumud që u zhvillua në ujërat ndërkombëtare , tha Ministri turk i Drejtësisë Akin Gurlek.
Ministri vuri në dukje se procedurat ligjore në lidhje me incidentin , i cili përfshin aktivistë që përpiqen të shpërndajnë ndihmë humanitare në Rripin e Gazës, janë duke vazhduar para Gjykatës së 11-të të Lartë Penale në Stamboll.
Çështja, e regjistruar me numrin e çështjes 2026/108, përfshin 35 të pandehur, përfshirë Netanyahun dhe Moskovitchin.
Gurlek gjithashtu kujtoi se urdhër-arreste për Netanyahun dhe Moskovitchin me akuza për gjenocid ishin lëshuar më 14 korrik.
Pas këtyre dy urdhrave, Ministria e Drejtësisë i kërkoi Ministrisë së Brendshme të fillonte procesin e kërkimit të një kodi të kuq të Interpolit në mënyrë që të dy të mund të kërkoheshin ndërkombëtarisht. Dokumentacioni përkatës iu dërgua gjithashtu Ministrisë së Punëve të Jashtme.
Ndërkohë ju rikujtojmë se tre anije të Flotiljes Global Sumud janë nisur nga Puglia drejt Shqipërisë, me destinacion ishullin e Sazanit. Aktivistët pritet të mbërrijnë në Shqipëri për t’iu bashkuar protestave kundër projektit për ndërtimin e një resorti në ishull.
Misioni i flotës, sipas organizatorëve, synon të shprehë solidaritet me protestuesit shqiptarë dhe kundërshtimin ndaj zhvillimit të Sazanit.
