Klinika e Sëmundjeve Infektive ka regjistruar viktimën e gjashtë të infektuar me virusin e Nilit Perëndimor.
Drejtori i Klinikës, Adil Cana, bëri të ditur se bëhet fjalë për një pacient 72-vjeçar, i cili ishte i shtruar në Klinikë prej 15 ditësh dhe kishte një gjendje të përgjithshme jashtëzakonisht të rëndë.
“Dje pasdite, vdiq një pacient tjetër. Bëhet fjalë për një pacient 72-vjeçar, i cili ishte shtruar në spital 15 ditë më parë, në një gjendje të përgjithshme jashtëzakonisht të rëndë, me një pamje të rëndë klinike. Pavarësisht të gjitha masave intensive të marra në njësinë e kujdesit intensiv, dje pasdite ai pati rezultat fatal”, deklaroi Cana.
Sipas të dhënave të Klinikës, deri më tani janë hospitalizuar gjithsej 57 pacientë me ethet e Nilit Perëndimor.
Nga ky numër, 27 pacientë janë shëruar, ndërsa 18 vazhdojnë të marrin trajtim. Prej tyre, 15 pacientë e kanë të konfirmuar laboratorikisht infeksionin me virusin e Nilit Perëndimor.
Sipas drejtorit Cana, të gjithë pacientët me infeksion të konfirmuar aktualisht janë në formë neuroinvazive të sëmundjes.
