Ish-kryeministri britanik Tony Blair është dërguar së fundmi nga Bordi i Paqes i Donald Trumpit për t’i kërkuar Autoritetit Palestinez (AP) që në tekstet shkollore të zëvendësojë çdo përmendje të fjalës “Palestinë” me emërtimin hebre “Samaria”, ka mësuar Middle East Eye.
Jeremy Greenstock, i cili ishte ambasador i Britanisë në OKB nga viti 1998 deri në vitin 2003, i tha MEE-së se Blair u përpoq të ushtronte presion mbi Autoritetin Palestinez, duke thënë se, nëse AP-ja dëshironte të shihej nga Bordi i Paqes si e aftë për të arritur një marrëveshje me Izraelin për t’i dhënë fund luftës në Gaza, atëherë fjala “Palestinë” duhej të hiqej nga tekstet shkollore.Në një intervistë të gjerë për David Hearst Podcast, Greenstock tha se kërkesa u refuzua nga presidenti i Autoritetit Palestinez, Mahmoud Abbas.Greenstock tha gjithashtu se ish-shefi i tij po përballej me “vështirësi” në rolin e tij të ri, ku mbikëqyr menaxhimin e Gazës pas luftës në emër të Bordit të Paqes.
“Siç kuptoj unë, së fundmi Bordi i Paqes i kërkoi të shkonte në Ramallah dhe të kërkonte heqjen nga programi arsimor palestinez të çdo përmendjeje të fjalës ‘Palestinë’, nëse ata do të trajtoheshin nga Bordi i Paqes si të aftë për të arritur një marrëveshje me Izraelin për t’i dhënë fund konfliktit aktual, i cili kishte nisur pas 7 tetorit”, tha Greenstock, duke shtuar se këtë informacion e kishte marrë nga një burim në nivel ministror.
“Presidenti Mahmoud Abbas tha se nuk do të bënte diçka të tillë”, deklaroi ai.“Por vetë fakti që Bordi i Paqes mund të kërkojë një gjë të tillë në programin arsimor palestinez më bën të pyes veten se mbi çfarë parimesh po vepron Bordi i Paqes dhe çfarë kuptimi kanë ata për drejtësinë, ndjenjën e barazisë dhe historinë e gjithë kësaj”, shtoi Greenstock.
Ndërkohë, Instituti i Blair për Ndryshime Globale (TBI) mohoi se ish-kryeministri britanik e kishte bërë këtë kërkesë.
