Presidenti i FIFA-s, Gianni Infantino, do të rikandidojë për një mandat tjetër në zgjedhjet që do të mbahen vitin e ardhshëm.
Një zëdhënës i FIFA-s ka konfirmuar se qëndrimi i Infantinos nuk ka ndryshuar, duke deklaruar se ai do të jetë kandidat për president edhe në vitin 2027.
Infantino, i cili u zgjodh për herë të parë në krye të FIFA-s në vitin 2016, është përballur së fundmi me presion të madh pas një plani kontrovers investimesh private të FIFA-s. Projekti, i cili tashmë është tërhequr, parashikonte përfshirjen e investitorëve të jashtëm në një degë komerciale të quajtur FIFA Forward Enterprise (FFE).
Plani shkaktoi reagime të ashpra në botën e futbollit, me kritikë që akuzuan FIFA-n se po tentonte ta “shiste” sportin.
Përplasjet rreth Infantinos u thelluan edhe mes konfederatave rajonale dhe federatave kombëtare. Në gusht, disa shtete evropiane hoqën dorë nga kërcënimi për bojkot të garave të FIFA-s, pasi UEFA njoftoi se kishte marrë garanci se plani për FFE ishte tërhequr “në mënyrë të pakthyeshme dhe të përhershme”.
Megjithatë, UEFA ka vazhduar të kërkojë largimin e Infantinos nga posti i presidentit të FIFA-s.
Zgjedhjet e ardhshme presidenciale të FIFA-s do të mbahen në Kongresin e 77-të të organizatës, më 18 mars 2027, në Rabat të Marokut.
Duke folur në Kongresin e 76-të të FIFA-s në Vancouver të Kanadasë, Infantino kishte konfirmuar publikisht se do të garojë sërish për këtë post.
“Dua t’ju them juve, 211 shoqatave anëtare të FIFA-s, se do të jem kandidat për zgjedhjen e presidentit të FIFA-s vitin e ardhshëm”, kishte deklaruar ai.
