Nga sot, 6 shtator, pushojnë së vlejturi masat e përkohshme të fleksibilitetit në zbatimin e Sistemit Evropian të Hyrjes dhe Daljes (EES), gjë që mund të sjellë pritje më të gjata për udhëtarët nga vendet jashtë Bashkimit Evropian.
Deri tani, në rast të krijimit të kolonave të mëdha, autoritetet kishin mundësi që përkohësisht të kufizonin ose pezullonin marrjen e të dhënave biometrike. Me përfundimin e kësaj periudhe, kontrollet duhet të kryhen plotësisht, duke përfshirë fotografimin dhe marrjen e gjurmëve të gishtërinjve, kur kjo parashihet nga sistemi.
Ndryshimi është veçanërisht i rëndësishëm edhe për qytetarët maqedonas që udhëtojnë në vendet ku zbatohet EES, pasi Maqedonia e Veriut nuk është anëtare e BE-së.
Përfaqësues të sektorit turistik dhe atij ajror paralajmërojnë se zbatimi i plotë i sistemit mund të shkaktojë sërish radhë më të gjata në disa prej pikave kufitare dhe aeroporteve më të frekuentuara.
Sipas të dhënave të publikuara nga industria ajrore, një kontroll që më parë zgjaste rreth 20 sekonda, me procedurat e reja biometrike në raste të caktuara mund të zgjasë deri në 90 sekonda për një udhëtar.
Në disa prej aeroporteve të mëdha evropiane tashmë janë regjistruar kohë më të gjata pritjeje, ndërsa gjatë periudhave më të ngarkuara ato mund të arrijnë deri në dy orë.
Për këtë arsye, organizatat turistike dhe kompanitë ajrore kërkojnë nga Brukseli zgjatjen e periudhës së fleksibilitetit, duke paralajmëruar se disa aeroporte dhe pika kufitare ende nuk kanë numër të mjaftueshëm të kiosqeve të automatizuara dhe stafit.
Për qytetarët maqedonas kjo praktikisht do të thotë se gjatë udhëtimit drejt vendeve të përfshira në EES duhet të llogaritet mundësia për procedura më të gjata kufitare, veçanërisht gjatë periudhave me qarkullim të shtuar. përcjell Zhurnal.mk .
