Xhezair Shaqiri – Komandant Hoxha ka reaguar ashpër ndaj, siç thotë ai, deklaratave dhe interpretimeve të reja për ngjarjet që i paraprinë dhe shoqëruan konfliktin e vitit 2001.
Mbi 25 vjet pas ngjarjeve, Shaqiri thotë se kujtimet zbehen, ndërsa ata që nuk kanë qenë dëshmitarë të drejtpërdrejtë të ngjarjeve po ngatërrojnë personat, komandantët dhe kronologjinë.
Sipas tij, ai ishte i angazhuar në Tanushë që në vitin 1999, kur, siç pretendon, ende nuk kishte shtabe dhe komandantë.
Ai thotë se bashkë me disa bashkëfshatarë nga Tanusha dhe Debelldeu kishte grumbulluar armatim dhe kishte krijuar baza në Tanushë, Malinë dhe Brezë.
“TANUSHA ISHTE E PARA”
Shaqiri kundërshton versionet që vendosin Graçanin apo Kalanë e Tetovës si pika të para të përplasjes.
Sipas tij, krismat e para kanë ndodhur në Tanushë, disa javë më pas në Graçan dhe më vonë në Kalanë e Tetovës.
“Secili po e thotë të vërtetën, por jo të gjithë e dinë rendin se si kanë ndodhur ngjarjet”, shprehet ai.
Komandant Hoxha u referohet edhe deklaratave të Nasim Haradinajt dhe Mësusit, duke thënë se ata tregojnë atë që dinë për armatimin dhe logjistikën e formacioneve të tyre.
“KAM EDHE PËR TË TREGUAR PËR OSTRËNIN!”
Në pjesën më të bujshme të reagimit, Shaqiri përmend edhe Gëzim Ostrenin.
Ai pretendon se në fund të vitit 1998 e kishte marrë në pyetje Ostrenin në emër të UÇK-së dhe se më pas e kishte njoftuar atë me A. Ametin në Tiranë.
Por Shaqiri lë të kuptohet se nuk ka treguar gjithçka.
Ai thotë se ka çfarë të deklarojë edhe për një deklaratë të Ostrenit, por se këtë herë ka zgjedhur të mos flasë më gjatë.
“Ju kurseva juve, komentuesve të rinj”, shprehet Komandant Hoxha, duke lënë të hapur mundësinë për një reagim tjetër mbi zhvillimet e asaj periudhe.
