Presidenti amerikan, Donald Trump, ka deklaruar se Irani po kërkon të arrijë një marrëveshje me Shtetet e Bashkuara, ndërsa Uashingtoni po shqyrton nëse do të ndërmarrë veprime të tjera ushtarake kundër Teheranit.
Në një intervistë telefonike për NewsNation, Trump u pyet për deklaratat e tij të fundit se po konsideronte mundësinë e “asgjësimit” të Iranit. “Do të shohim se çfarë do të ndodhë”, u përgjigj presidenti amerikan.
I pyetur se çfarë pret nga Teherani përpara se të marrë një vendim, Trump tha se Irani aktualisht është i interesuar për një marrëveshje me SHBA-në.
“Për momentin, ata duan të arrijnë një marrëveshje”, tha Trump, duke shtuar se, sipas tij, Irani “po humbet në çdo aspekt”, si në planin financiar, ashtu edhe në atë ushtarak.
“Nëse marrëveshja nuk është marrëveshja e duhur, atëherë as që do ta shqyrtoja. Por tani për tani, ata duan të arrijnë një marrëveshje, sepse po humbasin në çdo aspekt”, deklaroi presidenti amerikan.
Trump foli gjithashtu për kontaktet me grupin Huthi në Jemen, duke thënë se SHBA-ja është në bisedime me grupin dhe se edhe ata “do të donin të shihnin nëse mund të arrijmë një marrëveshje”.
Deklaratat e Trump vijnë në një moment kur konflikti SHBA-Iran ka hyrë në muajin e shtatë. Presidenti amerikan ka thënë së fundmi se shpreson që lufta të jetë pranë fundit, ndërsa njëkohësisht ka paralajmëruar se po i afrohet një vendimi për ndërmarrjen e një tjetër sulmi të madh ndaj Iranit.
Sipas raportimeve të fundit, tensionet vazhdojnë edhe në ngushticën e Hormuzit, ndërsa mundësia e një kanali të ri diplomatik mes Uashingtonit dhe Teheranit mbetet në fokus.
