Kryeministri Hristijan Mickoski informoi se në Nju-Jork ka biseduar me Sekretarin amerikan të Shtetit, Marko Rubio, duke e vlerësuar takimin si të rëndësishëm për forcimin e mëtejshëm të marrëdhënieve maqedonase-amerikane.
“Në Nju-Jork, bisedova me Sekretarin e Shtetit të Shteteve të Bashkuara të Amerikës, Marko Rubio.
Këto bisedime kanë rëndësi të veçantë dhe konfirmojnë rëndësinë e partneritetit strategjik dhe dialogut të vazhdueshëm politik me Shtetet e Bashkuara të Amerikës”, njoftoi kryeministri.
“Komunikimi i drejtpërdrejtë në një nivel të lartë politik është një mundësi e rëndësishme për shkëmbimin e pikëpamjeve mbi çështje me interes të përbashkët, për thellimin e marrëdhënieve dypalëshe dhe për forcimin e mëtejshëm të pozicionit tonë si një aleat i qëndrueshëm dhe i besueshëm”, theksoi Mickoski.
Në njoftim, kryeministri u ndal edhe në kontekstin aktual gjeopolitik, duke theksuar se në një periudhë sfidash serioze, partneritetet e forta dhe dialogu i hapur me aleatët strategjikë janë me rëndësi të veçantë.
Ai tha se Maqedonia ka interesa shtetërore të përcaktuara qartë dhe se vazhdon t’i përfaqësojë ato “me dinjitet dhe parim” në bashkëpunim me partnerët e saj strategjikë.
“Vazhdojmë të forcojmë partneritetin strategjik maqedono-amerikan dhe të krijojmë mundësi të reja”, tha Mickoski.
