Ai dha më pas paralajmërimin më të drejtpërdrejtë lidhur me një sulm të mundshëm ndaj territorit rus, duke theksuar se përdorimi i armëve bërthamore është një opsion…
Presidenti rus, Vladimir Putin paraqiti ditën e sotme vizionin e tij për një rend ndërkombëtar gjithnjë e më shumëpolar, ndërsa argumentoi se dobësimi i asaj që ai e quan “hegjemonia perëndimore” do ta ndryshojë botën për mirë.
Në fjalimin në Klubin Ndërkombëtar të Diskutimit “Valdai” në Moskë, ai foli gjithashtu për luftën në Ukrainë, rrezikun e konflikteve të reja, armët e shkatërrimit në masë dhe tensionet rreth Kaliningradit. Putin mbërriti në skenë më shumë se dy orë pas orarit të parashikuar për fillimin e fjalimit. Ai tha se diskutimet në “Valdai” do të përqendroheshin te “çështjet më aktuale globale”.
Presidenti rus e vendosi një pjesë të rëndësishme të fjalimit në kontekstin e ndryshimit të ekuilibrave ndërkombëtarë. Sipas tij, tensionet globale do të zbuten ndërsa dobësohet dominimi i Perëndimit, megjithëse paralajmëroi se tranzicioni drejt një sistemi të ri ndërkombëtar do të shoqërohet me rreziqe.
“Situata globale do të ndryshojë për mirë drejt një rendi botëror shumëpolar më të qëndrueshëm, demokratik dhe të lirë. Është gjithashtu e qartë se në rrugën drejt një rendi të tillë botëror, na presin shumë rreziqe për shtetet, komunitetet, për çdo person, është e pashmangshme”, tha Putin.
Putin bëri thirrje për shmangien e “skenarëve katastrofikë”, ndërsa argumentoi se transformimet e sistemit ndërkombëtar mund të ushqejnë ambicie të reja dhe gatishmëri më të madhe të shteteve për të ndërmarrë rreziqe. Reuters raportoi se presidenti rus e cilësoi vazhdimin e konflikteve ndërkombëtare si shumë të mundshëm.
“Jam i sigurt se Rusia është vënë qëllimisht në një situatë ku thjesht është detyruar t’i përgjigjet këtij agresioni të dukshëm, është detyruar të mbrohet, duke marrë armët, na kanë vënë në këtë vijë të kuqe”,tha Putin.
Presidenti rus paralajmëroi se konfliktet ndërkombëtare ka gjasa të vazhdojnë edhe gjatë viteve të ardhshme.
“Do të doja të gabohesha në vlerësimin tim, por duket se trendet elastike të sotme për fat të keq janë vërtet të tilla”, tha ai.
Putin ngriti gjithashtu çështjen e rrezikut bërthamor dhe të armëve të tjera të shkatërrimit në masë. Ai tha se, në kushtet aktuale të tensioneve ndërkombëtare, nuk mund të përjashtohet kategorikisht përdorimi i tyre dhe argumentoi se shtetet duhet të punojnë për të parandaluar një skenar të tillë.
“Tani për tani, vendet kryesore në botë kanë në dispozicion armatime që mund të zhdukin të gjithë jetën, ose të paktën të çojnë në pasoja katastrofike. A mund të jemi të sigurt se këto armë nuk do të përdoren kurrë? Fatkeqësisht, nuk mund të jemi të sigurt”, paralajmëroi Putin.
Putin u ndal posaçërisht te Kaliningradi, enklava ruse në Detin Baltik, e vendosur mes Polonisë dhe Lituanisë, dy vende anëtare të NATO-s. Moska ka pretenduar se ekziston rreziku i përpjekjeve për izolimin ose bllokimin e Kaliningradit. NATO i ka kundërshtuar këto pretendime dhe ka deklaruar se aktivitetet e saj kanë karakter mbrojtës.
Putin tha se çdo veprim i drejtpërdrejtë kundër territorit rus do të përbënte “përshkallëzim të vërtetë”.
“Ne nuk po trembim askënd”, tha ai.
Më tej, presidenti rus mbrojti deklaratat e bëra më parë nga Ministria e Jashtme e Rusisë.
“Deklarata e ministrit të jashtëm dhe letrat që iu dërguan disa vendeve, nuk janë kërcënuese, por përgjigje ndaj përpjekjeve për të na kërcënuar”, tha Putin.
Ai dha më pas paralajmërimin më të drejtpërdrejtë lidhur me një sulm të mundshëm ndaj territorit rus, duke theksuar se përdorimi i armëve bërthamore është një opsion.
“Nëse bëhet fjalë për një sulm të drejtpërdrejtë ndaj Rusisë, këtu po i referohem Kaliningradit, por ndoshta edhe territoreve të tjera, atëherë, sigurisht, çështja e përdorimit nga Rusia të të gjitha armëve që ka në dispozicion vendi ynë do të shfaqej në mënyrë të pashmangshme dhe të menjëhershme në axhendë. Kjo është e pashmangshme”, tha Putin.
Gjatë pjesës së pyetjeve dhe përgjigjeve, Putin kundërshtoi gjithashtu paralajmërimet se Rusia mund të sulmojë në të ardhmen një vend tjetër evropian.
“Rusia nuk do të sulmojë askënd, por nëse sulmohet, do të duhet të hakmerret. Qytetarët e Bashkimit Evropian duhet ta kuptojnë këtë. Ne nuk po kërcënojmë askënd, nuk do të sulmojmë askënd në vitin 2029, as në vitin 2030, as në vitin 2050, por nëse përballemi me agresion, do të duhet të përgjigjemi”, tha ai.
Presidenti rus foli edhe për vendet që furnizojnë Ukrainën me armë. Ai tha se Rusia nuk do të sulmojë “territoret dhe ndërmarrjet” e këtyre vendeve “nesër”, por e përshkroi furnizimin e Kievit me armatime si “një kërcënim” që Moska duhet ta vlerësojë.
Putin foli edhe për fushatën ukrainase të sulmeve me dronë dhe armë me rreze të gjatë ndaj rafinerive dhe infrastrukturës energjetike ruse. Presidenti rus pranoi se Kievi ka arritur disa rezultate dhe vlerësoi se ndikimi ekonomik i këtyre goditjeve arrin rreth 1 për qind të prodhimit të brendshëm bruto të Rusisë.
“Në të vërtetë, ata arritën të siguronin disa rezultate sipas vlerësimeve tona dhe të merrnin rreth 1% të PBB-së sonë”, tha Putin./Pamfleti
