Aleanca për Shqiptarët është në rrugë drejt bashkimit – ndarjet mes dy fraksioneve në parti, të udhëhequra nga Arben Taravari dhe Ziadin Sela, duket se i përkasin të kaluarës. Nëse kjo realizohet, Aleanca për Shqiptarët do të ketë 9 deputetë në Kuvend dhe do të bëhet partia e dytë më e madhe politike mes shqiptarëve në Maqedoni. Aktualisht, BDI ka 10 deputetë.

Këto janë informacione jozyrtare që vijnë nga biseda të zhvilluara mes përfaqësuesve të lartë të të dy palëve, të cilët kanë shprehur gatishmëri për një Aleancë të bashkuar për Shqiptarët.

Sipas burimeve të MKD.mk, mes të dyja palëve po zhvillohen biseda joformale, me një intensifikim të komunikimit në periudhën e fundit, që shihet si sinjal për një afrim të mundshëm dhe koordinim të përbashkët.
Fraksioni i Ziadin Selës deri tani ka qenë afër BDI-së, ndërsa ai i Arben Taravarit është pjesë e koalicionit VLEN, i cili bën pjesë në shumicën qeverisëse.

Pas zgjedhjeve të fundit parlamentare, Aleanca për Shqiptarët u nda në dy tabore: njëra e udhëhequr nga Arben Taravari, që iu bashkua koalicionit opozitar VLEN, dhe tjetra e drejtuar nga Ziadin Sela, e cila u bë pjesë e Frontit Evropian të udhëhequr nga BDI.

Taravari siguroi 5 deputetë, ndërsa Sela 4. Megjithatë, të nëntë deputetët vijojnë të regjistrohen si përfaqësues të Aleancës për Shqiptarët, si në faqen zyrtare të Kuvendit, ashtu edhe në regjistrat e tjerë zyrtarë.
Paralelisht me këtë, para zgjedhjeve lokale, vazhdojnë tensionet dhe mosmarrëveshjet brenda koalicionit VLEN. Taravari ka paralajmëruar disa herë mundësinë e largimit nga koalicioni dhe pjesëmarrjen e pavarur në zgjedhjet lokale. Kjo e hap më tej mundësinë për një bashkim të mundshëm të Aleancës për Shqiptarët.

Nëse ky bashkim realizohet, ai mund të ndryshojë ndjeshëm raportet dhe ekuilibrat politikë brenda bllokut politik shqiptar në Maqedoni.(Almakos)