Maqedonia e Veriut po përballet me një valë të fuqishme të të nxehtit, ku për sot (26 qershor 2025) parashihet që temperatura të arrijë deri në 41°C, duke e tejkaluar edhe rekordin e vitit të kaluar, kur në gusht 2024 u regjistrua temperatura më e lartë prej 40.8°C, niveli më i lartë në 12 vitet e fundit.
Sipas meteorologëve, valët e të nxehtit që kanë përfshirë rajonin janë rezultat i masave të ajrit të thatë dhe të nxehtë që po vijnë nga Afrika Veriore. Kjo situatë është klasifikuar si alarm portokalli në disa zona, përfshirë rajonin e Pollogut, Shkupin, Vardarin dhe pjesën juglindore të vendit.
Institucionet shëndetësore dhe Drejtoria për Mbrojtje dhe Shpëtim kanë apeluar qytetarët që të shmangin daljet gjatë orëve të mesditës, të konsumojnë shumë lëngje dhe të mbrohen nga dielli, sidomos të moshuarit, fëmijët dhe personat me sëmundje kronike.
🔹 Rekomandime për qytetarët:
• Qëndroni në hije ose ambiente të freskëta gjatë orës 11:00–17:00
• Përdorni rroba të lehta dhe me ngjyrë të hapur
• Pini ujë të mjaftueshëm dhe shmangni pijet me kafeinë ose alkool
• Kujdes për kafshët dhe mos i lini në automjete të mbyllura
Ekspertët klimatikë kanë paralajmëruar se këto temperatura mund të bëhen gjithnjë e më të zakonshme në vitet e ardhshme si pasojë e ndryshimeve klimatike.
