Arben Taravari nga Aleanca për Shqiptarët, në një intervistë për “360 Gradë” i tregoi opinionit se brenda koalicionit VLEN ka probleme. Sipas tij, shihet prej 100 kilometrash që koalicioni nuk funksionon. Situatën e rëndon edhe përshtypja që qytetarët kanë për VLEN-in si përfaqësues i shqiptarëve në Qeveri. Megjithatë, Taravari me tone vetëkritike, disa herë përsëriti se fajet për këtë nuk i ka as VMRO-ja e as kryeministri Hristijan Mickoski, por vetë VLEN-i. Ai nuk tregoi nëse këtë perceptim e kanë edhe partitë e tjera përbërëse të VLEN, megjithatë, tha se sipas anketave që ai posedon, 2/3 e shqiptarëve kanë pakënaqësi.
“Unë mendoj se kemi shumë mangësi. Ajo nuk është shumë për shkak kryeministrit Mickoski aq sa është te ne. Ekziston, njëfarë dis-harmonizimi që ajo shihet prej 100 kilometrash se shumë ngadalë funksionojmë dhe më e keqja është se përshtypja e popullit për ne është se VLEN ka shumë pozicion të dobët në qeveri dhe vetëm unë që kam bërë tre anketa te shqiptarët, në përgjithësi të anketuar, përshtypja është rreth 70% të popullatës shqiptare mendojnë se VLEN nuk funksionon mirë. Nuk është i kënaqshëm përfaqësimi i shqiptarëve në qeveri”, deklaroi Arben Taravari, kryetar i Aleancës për Shqiptarët.
Pavarësisht dallimeve në VLEN, gjithsesi, në deklaratën më të re gjatë ditës, Taravari tha qartë se nuk ka ndërmend ta braktisë qeverinë. Nga ana tjetër, as edhe VLEN-in, pasi siç tha ai, grupe të punës së koalicionit po diskutojnë në Kuvend për të gjetur formulën e përshtatshme për të garuar në zgjedhje lokale së bashku.
“Ne kemi dy opsione për zgjedhjet lokale. Një, është që të shkojmë në zgjedhje së bashku, që unë dëshiroj të jetë ashtu, dhe e dyta të dalim vetë në zgjedhje lokale vetë, si Aleancë për Shqiptarët”, tha Arben Taravari, Aleanca për Shqiptarët.
Opsioni i dytë është ende i paqartë për opinionin se me çfarë logoje, partie dhe identiteti do të dalë Taravari si i vetëm. Ndërsa, sa u përket kontakteve me BDI-në, ai tha se ka kanale komunikimi dhe madje, deklaroi që ka sinjale për bashkëpunim. Taravari shtoi se nëse shkon i vetëm në zgjedhje lokale, nuk e përjashton mundësinë që këtë valle ta hedh me BDI-në.
“Nëse shkojmë në rrethin e dytë do të kërkonim mbështetje normalisht, ku do të shkojë BDI-ja, do të kërkonim nga VLEN-i, ku nuk do të shkojë BDI-ja, do të kërkonim mbështetje nga BDI-ja. Megjithatë, do të shohim, ky është opsion i dytë i mundshëm”, theksoi Arben Taravari, Aleanca për Shqiptarët.
Taravari gjithsesi nuk tregoi për disponimin e parterëve të tjerë në VLEN, por tha se ky ishte qëndrimi i tij personal për pjesëmarrjen në zgjedhje. Sikurse kemi raportuar më herët, partitë e tjera kanë qenë kategorisht kundër, madje e interpretojnë këtë si presion, për 40% të kulaçit të kandidatëve në zgjedhjet lokale. /Alsat.mk
