Marina Amerikane duket se ka humbur një nga avionët e saj më të shtrenjtë mbi Gjirin Persik javën e kaluar.
Një raport nga Komanda e Sigurisë Detare, i publikuar të martën, tha se mjeti ajror pa pilot MQ-4C Triton u rrëzua më 9 prill. Vendndodhja e rrëzimit nuk u bë publike për arsye sigurie operacionale.
Një kërkim i të dhënave të shërbimit të gjurmimit të fluturimeve FlightRadar24 i kryer nga CNN-i tregon se MQ-4C u ngrit nga stacioni ajror detar “Sigonella” në Itali dhe u zhduk mbi Gjirin Persik, më 9 prill.
Aeroplani po fluturonte mbi Ngushticën e Hormuzit, por pasi la hapësirën ajrore mbi ngushticë, ai zbriti nga një lartësi prej 50,000 këmbësh në 9,000 këmbë, përpara se kontakti me radarin të humbiste.
Të dhënat e fluturimit tregojnë se Triton transmetoi kodin 7400 gjatë fluturimit, duke treguar se kontakti me pilotin në tokë ishte humbur, dhe më pas kodin 7700 – që tregonte një emergjencë – rreth 70 minuta më vonë, ndërsa zbriti në 44,000 këmbë. Ai vazhdoi të transmetojë kodin 7700 deri në orën 10:12 UTC, kur u zhduk nga radari në një lartësi prej 9,250 këmbësh.
Arsyeja e humbjes nuk mund të përcaktohet nga të dhënat e disponueshme të fluturimit, dhe Marina deri më tani ka publikuar vetëm informacion se MQ-4C u rrëzua.
Prodhuesi Northrop Grumman e përshkruan Tritonin si ‘avionin pa pilot kryesor në botë për inteligjencën detare, mbikëqyrjen, zbulimin dhe synimin’.
I pajisur me një motor reaktiv dhe me një rreze veprimi prej 8,500 miljesh, MQ-4C mund të qëndrojë në ajër për më shumë se 24 orë.
Ky mjet ajror pa pilot është një nga më të rrallët në flotën e Marinës Amerikane – Northrop Grumman thotë se u prodhuan vetëm 20 – dhe gjithashtu një nga më të shtrenjtët, me një çmim prej rreth 240 milionë dollarësh secila. Kjo është më shumë se dyfishi i kostos së avionit luftarak të padukshëm F-35C.
