hërbimi i Kundërzbulimit i Shërbimit të Sigurisë së Ukrainës (SSU) ka goditur një rrjet spiunazhi që përfshinte dy shtetas kinezë, të cilët tentuan të eksportonin ilegalisht dokumente tepër sekrete mbi sistemin raketor ukrainas RK-360MC Neptune.
Sipas një deklarate të përbashkët nga SSU dhe Zyra e Prokurorit të Përgjithshëm, një ish-student 24-vjeçar në Universitetin Teknik të Kievit dhe babai i tij, që banonte në Kinë, u përpoqën t’i transferonin informacionet sensitive te shërbimet inteligjente kineze. Djali u kap në flagrancë, ndërsa po përpiqej të merrte dokumente të klasifikuara, ndërsa babai, që hyri në Ukrainë më 7 korrik, u arrestua më pas pasi vizitoi edhe ambasadën kineze në Kiev.
SSU deklaroi:
“Kundërzbulimi i SSU-së e zbuloi spiunin gjatë fazave fillestare të aktiviteteve të tij të inteligjencës dhe e ndaloi atë ndërsa ai po merrte dokumente të klasifikuara. Hapi tjetër ishte arrestimi i të atit, i cili do t’ua kalonte informacionin e klasifikuar shërbimeve speciale kineze.”
Rasti ka ndezur alarmin për përfshirjen e Kinës në një luftë të heshtur teknologjike në rajon, veçanërisht në një kohë kur Ukraina akuzon Kinën për furnizimin indirekt të Federatës Ruse me armatim.
Presidenti ukrainas Volodymyr Zelensky deklaroi:
“Kemi marrë informacion se Kina po furnizon me armë Federatën Ruse. Dhe jemi gati ta diskutojmë këtë në detaje.
Sot kemi informacion nga Shërbimi i Sigurisë, Shërbimi i Inteligjencës, në lidhje me barutin dhe artilerinë.”
Një ditë para arrestimeve, Zelensky vendosi sanksione ndaj pesë kompanive kineze, të cilat dyshohen se po furnizojnë Rusinë me komponentë për dronët Shahed, që përdoren në sulmet e përnatshme kundër Ukrainës.
SSU thekson se hetimet janë në zhvillim dhe të dy spiunët janë nën akuzë për veprën penale të spiunazhit.
