Bashkimi Demokratik për Integrim (BDI), dikur një forcë dominuese në politikën shqiptare në Maqedoninë e Veriut, tani po përballet me vështirësi për të mbushur edhe sallat më të vogla. Në mungesë të një përkrahjeje të natyrshme, partia ka bërë thirrje nga të gjitha qytetet që ta mirëpresin liderin e saj, Ali Ahmeti, në një tubim të quajtur “mbledhje me popullin” në sallën e Operës dhe Baletit në Shkup.
Një sinjal i qartë i rënies së ndikimit të BDI-së erdhi nga Çairi – bastioni i saj kryesor, i cili kësaj here nuk iu përgjigj si pritej. Për të shmangur turpin e një salle të zbrazët, partia u detyrua të sjellë njerëz nga qytete të tjera, duke u përpjekur të krijojë iluzionin e një mbështetjeje të madhe.
Rënia e mbështetjes për BDI-në nuk është e rastësishme. Përveç goditjes së madhe me vendosjen e ish-kryeministrit nga radhët e saj, Artan Grubi, në listën e zezë të SHBA-së, pakënaqësia në rritje buron edhe nga mospërfillja e figurave të reja dhe mungesa e reformave të vërteta brenda partisë. Ali Ahmeti vazhdon ta mbajë peng BDI-në me të njëjtat figura të korruptuara dhe të shpenzuara politikisht, duke injoruar kërkesat për ndryshim dhe për një qasje të re.
Ndërkohë, në skenën politike të Shkupit ka ndodhur një ndryshim i dukshëm. Lëvizja Demokratike e Izet Mexhitit dhe koalicioni VLEN kanë betonuar pozicionin e tyre si forca më e madhe politike në kryeqytet, veçanërisht në Çair, duke e lënë BDI-në të përballet me realitetin e humbjes së mbështetjes popullore.
