Komisioni Evropian po shqyrton mundësinë e rritjes së ndjeshme të taksave mbi produktet e duhanit, me synim uljen e konsumit dhe mbrojtjen e shëndetit publik. Por ky plan ka ndezur alarmin te industria gjermane e duhanit, e cila paralajmëron se masat e reja do të sjellin rritje drastike të çmimeve dhe rritje të kontrabandës.
Sipas Jan Mücke nga Shoqata Federale e Industrisë së Duhanit, nëse propozimi i BE-së miratohet, një pako cigaresh në Gjermani mund të shtrenjtohet nga 8,50 në mbi 12 euro, ndërsa duhani për rrotullim do të kushtojë mbi 18 euro për 30 gramë.
Industria shprehet se një “tronditje e tillë çmimesh” do të shndërrohej në stimul për tregtinë e paligjshme dhe do të dëmtonte bizneset e ndershme. Aktualisht, një në pesë cigare në Gjermani konsumohet jashtë sistemit të taksave, dhe ky raport mund të rritet ndjeshëm.
Edhe Parlamenti Evropian ka shprehur shqetësime, duke paralajmëruar se politika të tilla mund të shtyjnë tregun drejt informalitetit.
Nga ana tjetër, ekspertët e shëndetësisë mbështesin masat e reja, duke theksuar se rritja e taksave është mënyra më efikase për të ulur konsumin e duhanit, sidomos mes të rinjve.
Ndërkohë, mbetet e paqartë nëse propozimi i Komisionit do të miratohet në formën e tij aktuale, pasi pritet debat i gjerë në vendet anëtare dhe në Parlamentin Evropian.
