Kryetari i Komunës së Tetovës, Bilall Kasami, ka nderuar qytetin dhe kulturën shqiptare duke marrë çmimin prestigjioz “Grand Excellence 2024” në Tiranë. Ky çmim vlerëson angazhimin e Kasamit dhe të gjithë komunitetit për mbështetjen e kulturës shqiptare dhe posaçërisht të librit shqip.
Në deklaratën e tij, Kasami shprehu ndjenjat e tij të thella të mirënjohjes dhe përulësisë, duke e cilësuar këtë çmim si një dëshmi e forcës së rrënjëve tona dhe e rëndësisë së bashkëpunimit kulturor mes trojeve shqiptare dhe diasporës në perëndim. Ai theksoi se aktivitetet kulturore, ruajtja e gjuhës dhe traditave tona janë themeli mbi të cilin qëndron identiteti ynë kombëtar.
“Kjo mirënjohje nuk është vetëm e imja, por e të gjithë atyre që kontribuojnë çdo ditë për të mbajtur gjallë shpirtin shqiptar, brenda dhe jashtë kufijve,” tha Kasami. Ai falënderoi për besimin dhe mbështetjen e vazhdueshme të komunitetit.
Çmimi “Grand Excellence 2024” është një nder i madh për Tetovën dhe një dëshmi e përkushtimit të Kasamit dhe ekipit të tij për promovimin e kulturës dhe identitetit shqiptar.
