Presidenti amerikan pezullon për 10 ditë sulmet ndaj objekteve energjetike, ndërsa negociatat vijojnë mes tensioneve
Presidenti i Shteteve të Bashkuara, Donald Trump, njoftoi se ka vendosur të shtyjë me 10 ditë ultimatumin për goditjen e objekteve energjetike iraniane, duke e zgjatur afatin deri më 6 prill. Vendimi u bë publik përmes një deklarate në rrjetet sociale.
Sipas Trump, kjo lëvizje vjen pas një kërkese nga pala iraniane dhe synon t’i japë më shumë kohë procesit negociator që është në zhvillim.
“Me kërkesë të qeverisë iraniane, po pezulloj shkatërrimin e stacionit energjetik për 10 ditë, deri të hënën, 6 prill 2026, në orën 20:00 sipas kohës së Bregut Lindor”, shkroi ai.
Në të njëjtën deklaratë, presidenti amerikan theksoi se bisedimet mes dy palëve po zhvillohen dhe, sipas tij, “po shkojnë shumë mirë”, duke kundërshtuar raportimet mediatike që sugjerojnë të kundërtën.
“Negociatat janë në zhvillim dhe, pavarësisht deklaratave të pasakta nga mediat e lajmeve të rreme dhe të tjerë, po përparojnë shumë mirë”, shtoi ai.
Vendimi për të shtyrë ultimatumin vjen në një moment të tensionuar, ku Shtetet e Bashkuara kanë rritur praninë ushtarake në rajon dhe kanë paralajmëruar për mundësinë e sulmeve ndaj infrastrukturës energjetike të Iranit nëse nuk arrihet një marrëveshje.
Shtyrja e afatit sinjalizon një përpjekje për të mbajtur të hapur kanalin diplomatik, ndërsa presioni ushtarak mbetet i pranishëm. Deklaratat optimiste të Trump për ecurinë e negociatave kontrastojnë me pasigurinë që karakterizon situatën në terren.
