Ish-ministri i Jashtëm dhe nënkryetari i BDI-së, Bujar Osmani, ka deklaruar se ka bërë më shumë për afirmimin ndërkombëtar të gjuhës maqedonase sesa vetë maqedonasit. Në një status në rrjetet sociale, ai shprehet se ka luajtur rol kyç në pranimin e maqedonishtes në BE dhe në nënshkrimin e marrëveshjes së parë me BE-në ku kjo gjuhë njihet pa fusnota.
“Gjuha maqedonase u pranua në BE dhe në kornizën negociuese pa asnjë fusnotë. U nënshkrua marrëveshja e parë me BE-në ku njihet gjuha maqedonase (FRONTEX). Për afirmimin ndërkombëtar të gjuhës maqedonase kam bërë më shumë se cilido prej tyre.
Le të bëjë Kryeministri Mickoski për gjuhën shqipe gjysmën e asaj që kam bërë unë për maqedonishten, shqiptarët do t’i jenë shumë mirënjohës, por edhe më e rëndësishme, le të mos e rrezikojë atë që të tjerët para tij e kanë arritur”, shkruan Osmani.
Ndërkohë që Osmani krenohet me kontributin e tij për maqedonishten, gjatë qeverisjes së BDI-së gjuha shqipe mbeti e pazbatuar plotësisht si gjuhë zyrtare, me pengesa të shumta në institucione dhe pa një implementim të plotë në të gjitha nivelet. Në vend që të përqendrohej në avancimin e të drejtave të gjuhës shqipe, Osmani tani mburret se ka bërë për maqedonishten më shumë se vetë maqedonasit.
