Ministri i Politikës Sociale, Demografisë dhe Rinis, Fatmir Limani, përmes një postimi në facebok, ka ngritur dilema në opinion. Ai ka shkruar se taktizimet e Ali Ahmetit në përpilimin e listës së deputetëve kishte dy qëllime kryesore: shpëtimin e individëve të përfshirë në vepra kriminale dhe eliminimin e kuadrove të reja, të cilët u flijuan në vend të “Ujqërve të Vjetër.”

Ai ka shkruar se Ali Ahmeti, Musa Xhaferri, Sadulla Duraku, Blerim Bexheti e të tjerë u siguruan si funksionarë dekadash – duke i quajtur edhe si të shpërblyerit e shpëtimit

“Pasi shfrytëzuan shqiptarët dhe përvetësuan buxhetin shtetëror e partiak, ata garantuan amnisti për veten, duke u përfshirë me çdo kusht në listën e deputetëve. Artan Grubi, Kreshnik Bekteshi, Arbër Ademi, Ejup Rustemi e të tjerë – dikur motor i partisë dhe garant të financave të saj – tani do të paguajnë faturën e dy dekadave vjedhjesh të Ujqërve të Vjetër”, ka shkruar Limani.

Në fund Limani ka shtuar se “Ujqërit e Vjetër” flijuan gjeneratat e reja, të cilat, përmes energjisë dhe vrullit rinor, mbanin gjallë (së paku në dukje) frymën e BDI-së.