Drejtoria e të Ardhurave Publike (DAP) njofton se bashkëpunon në mënyrë të vazhdueshme me institucionet kompetente në të gjitha rastet ku ekziston dyshim për veprime të paligjshme në fushën tatimore, duke theksuar se lidhur me rastin aktual që përfshin 11 të punësuar, DAP është në bashkëpunim të plotë dhe të vazhdueshëm me prokurorinë, duke siguruar dhe dorëzuar të gjithë dokumentacionin, materialet dhe sqarimet ekspertë të lidhura me legjislacionin tatimor dhe procedurat, përcjell tetova1
Sipas komunikatës së Drejtorisë së të Ardhurave Publike, vëzhgimet dhe gjetjet e nxjerra nga kontrollet e kryera përbëjnë bazën për veprimet e organeve të tjera kompetente.
– Drejtoria e të Ardhurave Publike thekson qartë se nuk ka kompromis kur bëhet fjalë për veprime të paligjshme, keqpërdorim apo korrupsion. Këto fenomene janë të papranueshme dhe krejtësisht në kundërshtim me parimet profesionale dhe etike të institucionit. Në të njëjtën kohë, DAP thekson se në të gjitha procedurat duhet të respektohet në mënyrë rigoroze parimi i pafajësisë si garanci themelore në sistemin juridik – njofton Drejtoria e të Ardhurave Publike.
Ndërkohë, gjatë kohës së zhvillimit të procedurës, Drejtoria e të Ardhurave Publike ka ndërmarrë masa të duhura dhe në kohë për të siguruar funksionimin e pandërprerë të institucionit dhe stabilitetin e proceseve të punës në njësinë organizative të përfshirë. Këto veprime mundësojnë vazhdimësinë e punës, mbrojtjen e interesit publik dhe ruajtjen e integritetit institucional.
Drejtoria e të Ardhurave Publike mbetet e përkushtuar ndaj sundimit të ligjit, veprimit të përgjegjshëm dhe profesional, si dhe mbrojtjes së interesit publik. DAP vazhdon të bashkëpunojë me të gjitha organet kompetente për të përcaktuar përgjegjësitë aty ku ekzistojnë, por gjithashtu për të ruajtur reputacionin, besimin dhe integritetin e institucionit dhe të punonjësve të tij – theksohet në komunikatën e Drejtorisë së të Ardhurave Publike./tetova1.mk
