Një delegacion i VLEN-it sot ka vizituar fshatin Lubeten të Shkupit, ndërsa kanë përkujtuar masakrën e 12 gushtit të vitit 2001, kur forcat e policisë dhe ushtrisë së Maqedonisë vranë pamëshirshëm 9 burra dhe një fëmijë 6-vjeçar.
“Sot, në fshatin Luboten, së bashku me familjarët e dëshmorëve, ish-ushtarët e UÇK-së dhe banorët e kësaj ane, përkujtuam 12 gushtin 2001, një nga ditët më të dhimbshme për lubotenasit dhe të gjithë shqiptarët. Në mëngjesin e asaj dite, forcat policore-ushtarake të shtetit ndërmorën një operacion të egër dhe të pajustifikuar, duke vrarë dhjetë civilë shqiptarë, mes tyre edhe 6-vjeçarin Erxhan Aliu, simbol i pafajësisë së shuar padrejtësisht. Emrat e Dalip Muratit, Muharrem Ramadanit, Memet Memetit, Rami Jusufit, Xhelal Bajramit, Kadri Jasharit, Bajram Jasharit, Sulejman Bajramit dhe Atulla Qailit janë gdhendur përjetësisht në kujtesën tonë kolektive, si dëshmi e një krimi që nuk do të harrohet kurrë”, shkruan në profilin e tij në Facebbok, zëvendëskryeministri Arben Fetai.
Masakra e Lubotenit, siç është shprehur ai, është rasti i vetëm i luftës së vitit 2001 që u gjykua nga Tribunali Ndërkombëtar i Hagës, me dënim të plotfuqishëm si krim lufte. Sigurisht, ky ishte një hap drejt drejtësisë, por jo mjaftueshëm për të shëruar këtë plagë. “Të mos harrojmë kurrë që të mos përsëritet kurrë. Lavdi dhe nderim i përjetshëm për dëshmorët!”, ka përfunduar Fetai.
Ndryshe, Fetai në Lubeten ka qenë i shoqëruar nga zëvendëskryeministri I parë, Izet Mexhiti, kryetari I BESËS, Bilall Kasami dhe kryetari i Alternativës, Zeqirija Ibrahimi.
