Një gjykatës nga Departamenti për Krim të Organizuar në Gjykatën Themelore Penale të Shkupit, në një gjyq të mbyllur, ka dënuar një grup prej 10 personash për veprën penale “Trafikim me fëmijë”. Grupi, nga viti 2020 deri në maj 2023, kur policia zbuloi pedofilët, shiste dhe shfrytëzonte seksualisht një fëmijë nga një familje e cënueshme dhe e shpërbërë.
Sipas një përgjigjeje nga Gjykata Penale për portalin SakamDaKazham.mk, dënimet për të akuzuarit janë bërë të ditura, me shënimin se dënimi më i lartë, prej 10 vitesh burg, është ulur nga Gjykata e Apelit në 4.5 vite.
“Ju informojmë gjithashtu se, brenda të njëjtit rast, e akuzuara K.H., e cila ka pranuar fajësinë, fillimisht është dënuar me 10 vite burg sipas nenit 418-g paragrafi 1, në lidhje me nenin 45 të Kodit Penal. Megjithatë, pas ankimimit dhe procedurës në Gjykatën e Apelit, dënimi i saj u ndryshua në 4 vite e 6 muaj.”
E akuzuara G. Sh., për veprën penale Trafikim me fëmijë sipas nenit 418-g paragrafi 2, në lidhje me paragrafin 1 dhe nenin 45 të Kodit Penal, është dënuar nga gjykata me 7 vite e 6 muaj burgim.
I akuzuari S. S., për veprën penale Trafikim me fëmijë sipas nenit 418-g paragrafi 1 dhe nenit 45 të Kodit Penal, si dhe një tjetër vepër sipas nenit 418-g paragrafi 3, është dënuar me një dënim unik prej 8 vite e 6 muaj burgim.
E akuzuara A. P., për të njëjtën vepër sipas nenit 418-g paragrafi 1 dhe nenit 45, është dënuar me 6 vite burg.
I akuzuari R. A., për të njëjtën vepër, ka marrë 4 vite burgim, ndërsa i akuzuari I. Z. gjithashtu është dënuar me 4 vite burg.
Për të njëjtën vepër, i akuzuari I. E. është dënuar me 4 vite e 6 muaj, A. M. me 4 vite, K. K. me 5 vite dhe i akuzuari A. Sh. me 4 vite burgim.
Në verën e vitit 2020, e dyshuara kryesore e pranoi në shtëpinë e saj një vajzë katërmbëdhjetëvjeçare, e cila ishte viktimë, dhe më vonë pranoi edhe motrën e saj dhjetëvjeçare dhe vëllain shtatëvjeçar, për t’u kujdesur për ta për shkak të marrëdhënieve të tensionuara në familjen e tyre.
Shpejt më pas, duke shfrytëzuar gjendjen e pafuqisë dhe cenueshmërinë e viktimës, e dyshuara filloi ta detyronte vajzën të kryente veprime seksuale me disa të dyshuar dhe persona të tjerë të panjohur, në këmbim të një shpërblimi financiar. Shpesh kërcënimet ndaj viktimës lidhej me vëllain dhe motrën e saj, duke i thënë se, nëse nuk pranonte aktivitetet seksuale të planifikuara, ata do të përfundonin në një institucion ose do t’i kthenin te nëna e tyre.
Më vonë, tre nga të dyshuarit, sipas një marrëveshjeje paraprake me të dyshuarën kryesore dhe me qëllim përfitimin e paligjshëm material për veten, për dy vite me radhë e detyronin vajzën çdo ditë të kryente veprime seksuale, duke e shfrytëzuar seksualisht me të dyshuarit e tjerë dhe persona të panjohur, mes të cilëve kishte edhe një grua.
Personat e dyshuar që përdornin shërbimet seksuale, edhe pse ishin të vetëdijshëm se vajza ishte viktimë e trafikimit të fëmijëve, u paguanin tutorëve një shumë që varionte nga 50 deri në 200 euro.
Në këtë aktgjykim ende jo të formës së prerë, dënimet dominuese janë nga 4 deri në 4.5 vite burg. Për një vepër kaq të rëndë penale që ngarkohet mbi të akuzuarit dhe që shkel drejtpërdrejt Protokollin e Konventës për të Drejtat e Fëmijëve që lidhet me trafikimin e fëmijëve, prostitucionin dhe pornografinë e fëmijëve (MD-44/03-95), është e përcaktuar një dënim me burgim prej të paktën 8 vitesh, ndërsa për veprën e kryer nga e dyshuara kryesore, së paku 10 vite.
