Presidenti amerikan, Donald Trump, u ka bërë thirrje qytetarëve hungarezë që të dalin masivisht në votimet e së dielës për të mbështetur kryeministrin aktual, Viktor Orban, i cili pas 16 viteve në pushtet po përballet me një sfidë të vështirë elektorale. Trump e vlerësoi aleatin e tij të ngushtë si një udhëheqës të fortë dhe të fuqishëm, duke theksuar se ai ka ndihmuar në arritjen e sukseseve spektakolare në marrëdhëniet midis Shteteve të Bashkuara dhe Hungarisë.
”Hungari: dilni dhe votoni për Viktor Orbanin! Ai është një mik i vërtetë, një luftëtar dhe një fitues. Ai gëzon mbështetjen time të plotë për rizgjedhjen si Kryeministër i Hungarisë. Viktor Orban nuk do ta tradhtojë kurrë popullin hungarez dhe unë jam me të,” shkroi Trump në rrjetin e tij social.
Administrata e Trump po investon përpjekje të mëdha për të ndihmuar Orbanin, i cili sipas sondazheve të fundit është pas partisë “Tisa” të udhëhequr nga Péter Magyar. Në kuadër të kësaj mbështetjeje, Hungarinë e vizituan veçmas Sekretari i Shtetit, Marco Rubio, dhe Zëvendëspresidenti JD Vance. Ky i fundit u shpreh se SHBA-ja nuk ndërhyn në proceset zgjedhore të Hungarisë, por në të njëjtën kohë hodhi akuza ndaj Bashkimit Evropian për përfshirje në këto zgjedhje.
Në një miting parazgjedhor të mbajtur këtë javë, Vance shkoi edhe më tej duke deklaruar se, sipas vlerësimeve të tyre, Donald Trump gëzon aktualisht një popullaritet edhe më të madh se vetë Orban brenda Hungarisë.
