Ministrja e Financave, Gordana Dimitrieska-Koçoska, ka konfirmuar se do të respektohet detyrimi ligjor për rritjen gjysmëvjetore të pensioneve. Pas rritjes lineare prej 5,000 denarësh që u bë me ndryshimin e buxhetit, tani pritet një rritje shtesë në pensione.
Megjithatë, për shkak të mosrealizimit të plotë të të ardhurave në Fondin e Pensioneve dhe Invaliditetit (PIOM), do të jetë e nevojshme që të transferohen mjete shtesë nga buxheti shtetëror për të mbuluar këtë diferencë.
Ministrja theksoi se pavarësisht këtyre sfidave, rritja e pensioneve do të vazhdojë sipas ligjit, dhe shuma e saktë e rritjes do të bëhet e ditur pas përfundimit të muajit, pasi të kryhen të gjitha llogaritjet për përshtatjen e pensioneve deri në fund të vitit.
