Zv.kryeministri Arben Fetai po qëndron për vizitë në Bosnje Hercegovinë. Në kuadër të kësaj vizite ai sot ka takuar senatoren belge Viviane Teitelbaum, anëtare e Komitetit Këshillues Federal për Çështjet Evropiane, me të cilën ka diskutuar mbi perspektivën evropiane të Ballkanit Perëndimor.

“Pata kënaqësinë të takoj në Sarajevë Senatoren belge Viviane Teitelbaum, anëtare e Komitetit Këshillues Federal për Çështjet Evropiane, me të cilën diskutuam mbi perspektivën evropiane të Ballkanit Perëndimor dhe domosdonë e përshpejtimit të këtij proces.
E informova Senatoren Teitelbaum mbi reformat që Maqedonia e Veriut po ndërmerr si pjesë e Agjendës së Reformave në kuadër të Planit të Rritjes së BE-së për Ballkanin Perëndimor, me fokus të veçantë në shtetin e së drejtës dhe reformën e administratës publike. Belgjika mbetet një mbështetëse e fortë e zgjerimit të BE-së dhe e përpjekjeve të vendit tonë për integrim në familjen evropiane.
Në emër të Qeverisë, i shpreha Senatores Teitelbaum mirënjohjen tonë të thellë për solidaritetin që Belgjika tregoi pas tragjedisë në Koçan, duke mirëpritur katër pacientë për trajtim në spitalet belge. Ky akt humaniteti dhe mbështetjeje është dëshmi e lidhjeve të forta mes dy vendeve tona”, ka shkruar Fetai.